Namangan viloyati ichki ishlar organlarida sinov tartibida ishga tushirilgan “102” tizimiga o‘tgan ikki oy davomida 45 mingdan ortiq qo‘ng‘iroq qabul qilindi. Bu haqda mazkur tizim rahbari, podpolkovnik Shuhrat Rahimov ma’lum qildi, deya xabar beradi “Daryo” muxbiri Azizbek Abduvaliyev.
Respublikada birinchilardan bo‘lib joriy etilgan tizim faoliyati uchun 14 ta shtat birligi, operatorlar zali va vaziyatlar markazi ajratib berildi. 102 va shahar-tuman IIBlar o‘rtasida maxsus aloqa tarmog‘i o‘rnatildi. Endilikda barcha uyali aloqa kompaniyalari va aloqa tarmoqlaridan tushadigan xabarlar bevosita call-markaz operatorlari tomonidan qabul qilinib, ichki ishlar organlari xodimlarining tez fursatda hodisa joyiga yetib borishi, tergov-tezkor guruhining o‘z vaqtida chiqishi hamda har bir holat o‘rnatilgan tartibda elektron jurnalda qayd etilishi ta’minlanmoqda.
“Shu paytgacha tizimga kelib tushgan har o‘ninchi qo‘ng‘iroqni jinoyat va hodisalar haqidagi xabarlar tashkil etdi. Operatorlar tomonidan bir kunda o‘rtacha 800 dan ortiq qo‘ng‘iroq qabul qilinmoqda. Oilaviy nizolar, firibgarlik holatlari, avtomobillarning belgilanmagan joylarga qo‘yilishi bo‘yicha murojaatlar ko‘p. Ichki ishlar xodimlarining xatti-harakatlari yuzasidan murojaatlar ham kelib tushmoqda. Ular tegishli tartibda kadrlar bilan ishlash tizimi va o‘z xavfsizligi bo‘limiga yo‘naltiriladi”, — deydi Shuhrat Rahimov.
IIB mulozimiga ko‘ra, “102” tizimiga yolg‘on murojaatlar kelib tushishi ham qayd etilmoqda. Jumladan, yaqinda Uychi tumanidan bosqinchilik holati yuzasidan ma’lumot kelib tushgan. Tergov-tezkor guruhi ko‘rsatilgan manzilga borganida esa murojaat asossiz bo‘lib chiqdi. Bu holat yuzasidan materiallar to‘planib, sudga chiqarilgan.
Kelgusida call-markazga murojaat qiluvchi shaxslarga har tomonlama ko‘mak berish maqsadida psixologlar, yuristlar va tarjimonlar faoliyatini ham yo‘lga qo‘yish rejalashtirilmoqda.
Ma’lumot uchun, “102” tizimi 2021-yilning sentabr oyiga qadar sinov tartibida ish olib boradi.
Izoh (0)