Наманган вилояти ички ишлар органларида синов тартибида ишга туширилган «102» тизимига ўтган икки ой давомида 45 мингдан ортиқ қўнғироқ қабул қилинди. Бу ҳақда мазкур тизим раҳбари, подполковник Шуҳрат Раҳимов маълум қилди, дея хабар беради «Дарё» мухбири Азизбек Абдувалиев.
Республикада биринчилардан бўлиб жорий этилган тизим фаолияти учун 14 та штат бирлиги, операторлар зали ва вазиятлар маркази ажратиб берилди. 102 ва шаҳар-туман ИИБлар ўртасида махсус алоқа тармоғи ўрнатилди. Эндиликда барча уяли алоқа компаниялари ва алоқа тармоқларидан тушадиган хабарлар бевосита call-марказ операторлари томонидан қабул қилиниб, ички ишлар органлари ходимларининг тез фурсатда ҳодиса жойига етиб бориши, тергов-тезкор гуруҳининг ўз вақтида чиқиши ҳамда ҳар бир ҳолат ўрнатилган тартибда электрон журналда қайд этилиши таъминланмоқда.
«Шу пайтгача тизимга келиб тушган ҳар ўнинчи қўнғироқни жиноят ва ҳодисалар ҳақидаги хабарлар ташкил этди. Операторлар томонидан бир кунда ўртача 800 дан ортиқ қўнғироқ қабул қилинмоқда. Оилавий низолар, фирибгарлик ҳолатлари, автомобилларнинг белгиланмаган жойларга қўйилиши бўйича мурожаатлар кўп. Ички ишлар ходимларининг хатти-ҳаракатлари юзасидан мурожаатлар ҳам келиб тушмоқда. Улар тегишли тартибда кадрлар билан ишлаш тизими ва ўз хавфсизлиги бўлимига йўналтирилади», — дейди Шуҳрат Раҳимов.
ИИБ мулозимига кўра, «102» тизимига ёлғон мурожаатлар келиб тушиши ҳам қайд этилмоқда. Жумладан, яқинда Уйчи туманидан босқинчилик ҳолати юзасидан маълумот келиб тушган. Тергов-тезкор гуруҳи кўрсатилган манзилга борганида эса мурожаат асоссиз бўлиб чиқди. Бу ҳолат юзасидан материаллар тўпланиб, судга чиқарилган.
Келгусида call-марказга мурожаат қилувчи шахсларга ҳар томонлама кўмак бериш мақсадида психологлар, юристлар ва таржимонлар фаолиятини ҳам йўлга қўйиш режалаштирилмоқда.
Маълумот учун, «102» тизими 2021 йилнинг сентябрь ойига қадар синов тартибида иш олиб боради.
Изоҳ (0)