AQSh prezidenti Jo Bayden ma’muriyati Pentagonga Donald Trampdan ko‘ra kamroq budjet taklif qilishni rejalashtirmoqda. Bu haqda Bloomberg xabar berdi.
9-aprel, juma kuni Oq uy shu yilning 1-oktabridan boshlanadigan 2022-moliya yili uchun AQSh budjetining asosiy parametrlarini e’lon qilishi kerak. Agentlik ma’lumotlariga ko‘ra, mudofaaga sarflanadigan xarajat ko‘pi bilan 715 milliard dollarni tashkil etadi.
Saylovda respublikachilar g‘olib chiqqan taqdirda, Tramp Pentagonga 722 milliard dollar ajratmoqchi edi. Demak, mavjud qisqartirish taxminan 0,4 foizni tashkil qilmoqda, lekin inflyatsiyani hisobga olgan holda Baydenning taklifi 704 milliard dollarni tashkil qilishi mumkin.
Oq uyning harbiy xarajatlarni qisqartirish bo‘yicha rejalari 2017-yil Pentagon tomonidan ma’qullangan va 2018-yil Kongress respublikachilari tomonidan qo‘llab-quvvatlangan AQSh milliy mudofaa strategiyasiga zid hisoblanadi. Bu reja mudofaa xarajatlarining yiliga 3-5 foizgacha o‘sishini nazarda tutadi.
Bloomberg’ning xabariga ko‘ra, Oq uyning pozitsiyasi harbiy xarajatlarni kamaytirishni talab qilayotgan demokrat kongressmenlar murosasiga xizmat qilmoqda. Kelishuvga erishish uchun mudofaa budjeti mablag‘larning bir qismi to‘g‘ridan to‘g‘ri Pentagon tomonidan boshqariladigan ekologik loyihalarga yo‘naltiriladi. Shuningdek, o‘n yil ichida birinchi marta AQSh budjeti harbiy va noharbiy xarajatlarning qat’iy cheklanishini ko‘rib chiqmadi, bu esa qonun chiqaruvchilarga mablag‘larni qayta taqsimlashga imkon beradi.
Tramp boshqaruvi davrida AQSh mudofaa xarajatlari doimiy o‘sib, 2019-moliya yilida 716 milliard dollar, 2020-moliya yilida 738 milliard dollar, 2021-yilda 740 milliard dollarni tashkil qilgan edi.
Avvalroq AQSh Mudofaa vazirligi qurolli kuchlarning yaqin o‘n yilliklarda dunyoda ehtimoliy mojarolarga jangovar tayyorgarligini oshirishda o‘z maqsadlariga erisha olmaganini ma’lum qilgandi. Mudofaa vazirligi tekshiruv bo‘limi bayonotining xulosalarini to‘liq ma’qullashini bildirgan.
Shuningdek, AQSh harbiy havo kuchlarining AGM-183A ARRW gipertovushli raketasi sinovlari muvaffaqiyatsiz tugadi. Raketa Boeing B-52 Stratofortress bombardimonchi samolyotidan uchirilishi kerak edi. “Biroq raketa uchish tartibini yakunlay olmadi va samolyotda qolib ketdi.
Izoh (0)