АҚШ президенти Жо Байден маъмурияти Пентагонга Дональд Трампдан кўра камроқ бюджет таклиф қилишни режалаштирмоқда. Бу ҳақда Bloomberg хабар берди.
9 апрель, жума куни Оқ уй шу йилнинг 1 октябридан бошланадиган 2022-молия йили учун АҚШ бюджетининг асосий параметрларини эълон қилиши керак. Агентлик маълумотларига кўра, мудофаага сарфланадиган харажат кўпи билан 715 миллиард долларни ташкил этади.
Сайловда республикачилар ғолиб чиққан тақдирда, Трамп Пентагонга 722 миллиард доллар ажратмоқчи эди. Демак, мавжуд қисқартириш тахминан 0,4 фоизни ташкил қилмоқда, лекин инфляцияни ҳисобга олган ҳолда Байденнинг таклифи 704 миллиард долларни ташкил қилиши мумкин.
Оқ уйнинг ҳарбий харажатларни қисқартириш бўйича режалари 2017 йил Пентагон томонидан маъқулланган ва 2018 йил Конгресс республикачилари томонидан қўллаб-қувватланган АҚШ миллий мудофаа стратегиясига зид ҳисобланади. Бу режа мудофаа харажатларининг йилига 3-5 фоизгача ўсишини назарда тутади.
Bloomberg’нинг хабарига кўра, Оқ уйнинг позицияси ҳарбий харажатларни камайтиришни талаб қилаётган демократ конгрессменлар муросасига хизмат қилмоқда. Келишувга эришиш учун мудофаа бюджети маблағларнинг бир қисми тўғридан-тўғри Пентагон томонидан бошқариладиган экологик лойиҳаларга йўналтирилади. Шунингдек, ўн йил ичида биринчи марта АҚШ бюджети ҳарбий ва ноҳарбий харажатларнинг қатъий чекланишини кўриб чиқмади, бу эса қонун чиқарувчиларга маблағларни қайта тақсимлашга имкон беради.
Трамп бошқаруви даврида АҚШ мудофаа харажатлари доимий ўсиб, 2019-молия йилида 716 миллиард доллар, 2020-молия йилида 738 миллиард доллар, 2021 йилда 740 миллиард долларни ташкил қилган эди.
Аввалроқ АҚШ Мудофаа вазирлиги қуролли кучларнинг яқин ўн йилликларда дунёда эҳтимолий можароларга жанговар тайёргарлигини оширишда ўз мақсадларига эриша олмаганини маълум қилганди. Мудофаа вазирлиги текширув бўлими баёнотининг хулосаларини тўлиқ маъқуллашини билдирган.
Шунингдек, АҚШ ҳарбий ҳаво кучларининг AGM-183A ARRW гипертовушли ракетаси синовлари муваффақиятсиз тугади. Ракета Boeing Б-52 Stratofortress бомбардимончи самолётидан учирилиши керак эди. «Бироқ ракета учиш тартибини якунлай олмади ва самолётда қолиб кетди.
Изоҳ (0)