Namanganda 2020-yil davomida tazyiq va zo‘ravonlikka uchragan 784 nafar ayolga himoya orderi berildi. Bu haqda “Daryo” muxbiri Azizbek Abduvaliyev xabar bermoqda.
Ulardan 3 nafarini voyaga yetmaganlar, 77 nafarini esa 30 yoshgacha bo‘lganlar tashkil etgan.
Namangan viloyat IIB xotin-qizlar bo‘limi boshlig‘i, podpolkovnik Nasiba Turg‘unovaning ma’lum qilishicha, 784 ta holatdan 718 tasida eri tomonidan xotiniga, 13 tasida qaynona tomonidan keliniga, 1 tasida kelin tomonidan qaynonaga, 52 ta holatda esa boshqa shaxslar tomonidan tazyiq va zo‘ravonlik sodir etilganligi aniqlangan.
Ularning 311 tasini jismoniy, 24 tasini ruhiy, 3 tasini iqtisodiy, bittasini esa jinsiy zo‘ravonlik tashkil etgan. 445 ta holatda esa tazyiq o‘tkazilgan.
“Order uch nusxada tuzilib, jabrdiyda, zo‘ravon va profilaktika inspektorida qoldiriladi. Tazyiq o‘tkazayotgan shaxsga nisbatan jabrdiyda bilan aloqalarni taqiqlash, bir xonada birga bo‘lishni man etish, yetkazilgan zararni qoplash kabi cheklovlar joriy etiladi. Himoya orderi odatda bir oy muddatga beriladi, keyinchalik yana bir oyga uzaytirilishi mumkin. Shunda ham o‘zgarish bo‘lmasa, tayyorlangan materiallar sudga chiqariladi va zo‘ravon jarima yoki 15 sutka ma’muriy qamoq jazosiga tortiladi”, — deydi Nasiba Turg‘unova.
IIB mulozimiga ko‘ra, Namangan viloyatida 2021-yil 2 oyi davomida tazyiq va zo‘ravonlikka uchragan 322 nafar ayolga himoya orderi berilgan.
Namangan shahrida Respublika reabilitatsiya va moslashtirish markazi viloyat hududiy bo‘limi ham o‘z faoliyatini boshladi. Ikki qavat, 7 xonadan iborat binoda murosasi qochgan oilalar bilan muloqot o‘tkazish, huquqshunos yoki psixolog maslahatini olish, jabrdiyda ayollar esa ma’lum muddat istiqomat qilishi ham mumkin.
Markaz ijrochi direktori Nazira Rahimjonovaning aytishicha, hozir bu yerda Moldova fuqarosi bo‘lgan va namanganlik yigitga turmushga chiqqan ayol ikki farzandi bilan istiqomat qilmoqda. U endi bolalari bilan vataniga qaytish niyatida.
“Namangan shahridan bo‘lgan kelinchak qo‘lida chaqalog‘i bilan kelib, 8 oy davomida shu yerda yashadi. Imkon boricha oziq-ovqat, kiyim-kechakdan yordam berib turdik, zoriqmadi, boshpanaga ega bo‘ldi. Oxiri turmush o‘rtog‘i bilan yarashib, oilasiga qaytdi. Turmushi tiklandi, bolalari yetim bo‘lmadi, biz shundan xursandmiz”, — deydi Nazira Rahimjonovа.
[telegram_embed_post link=""]
Izoh (0)