Наманганда 2020 йил давомида тазйиқ ва зўравонликка учраган 784 нафар аёлга ҳимоя ордери берилди. Бу ҳақда «Дарё» мухбири Азизбек Абдувалиев хабар бермоқда.
Улардан 3 нафарини вояга етмаганлар, 77 нафарини эса 30 ёшгача бўлганлар ташкил этган.
Наманган вилоят ИИБ хотин-қизлар бўлими бошлиғи, подполковник Насиба Турғунованинг маълум қилишича, 784 та ҳолатдан 718 тасида эри томонидан хотинига, 13 тасида қайнона томонидан келинига, 1 тасида келин томонидан қайнонага, 52 та ҳолатда эса бошқа шахслар томонидан тазйиқ ва зўравонлик содир этилганлиги аниқланган.
Уларнинг 311 тасини жисмоний, 24 тасини руҳий, 3 тасини иқтисодий, биттасини эса жинсий зўравонлик ташкил этган. 445 та ҳолатда эса тазйиқ ўтказилган.
«Ордер уч нусхада тузилиб, жабрдийда, зўравон ва профилактика инспекторида қолдирилади. Тазйиқ ўтказаётган шахсга нисбатан жабрдийда билан алоқаларни тақиқлаш, бир хонада бирга бўлишни ман этиш, етказилган зарарни қоплаш каби чекловлар жорий этилади. Ҳимоя ордери одатда бир ой муддатга берилади, кейинчалик яна бир ойга узайтирилиши мумкин. Шунда ҳам ўзгариш бўлмаса, тайёрланган материаллар судга чиқарилади ва зўравон жарима ёки 15 сутка маъмурий қамоқ жазосига тортилади», — дейди Насиба Турғунова.
ИИБ мулозимига кўра, Наманган вилоятида 2021 йил 2 ойи давомида тазйиқ ва зўравонликка учраган 322 нафар аёлга ҳимоя ордери берилган.
Наманган шаҳрида Республика реабилитация ва мослаштириш маркази вилоят ҳудудий бўлими ҳам ўз фаолиятини бошлади. Икки қават, 7 хонадан иборат бинода муросаси қочган оилалар билан мулоқот ўтказиш, ҳуқуқшунос ёки психолог маслаҳатини олиш, жабрдийда аёллар эса маълум муддат истиқомат қилиши ҳам мумкин.
Марказ ижрочи директори Назира Раҳимжонованинг айтишича, ҳозир бу ерда Молдова фуқароси бўлган ва наманганлик йигитга турмушга чиққан аёл икки фарзанди билан истиқомат қилмоқда. У энди болалари билан ватанига қайтиш ниятида.
«Наманган шаҳридан бўлган келинчак қўлида чақалоғи билан келиб, 8 ой давомида шу ерда яшади. Имкон борича озиқ-овқат, кийим-кечакдан ёрдам бериб турдик, зориқмади, бошпанага эга бўлди. Охири турмуш ўртоғи билан ярашиб, оиласига қайтди. Турмуши тикланди, болалари етим бўлмади, биз шундан хурсандмиз», — дейди Назира Раҳимжонова.
[telegram_embed_post link=""]
Изоҳ (0)