Volkswagen of America — Германиянинг Volkswagen автомобилсозлик компаниясининг Америкадаги бўлими, май ойида расмий равишда ўз номини Voltswagen of America деб ўзгартирмоқчилиги ҳақида маълум қилди, деб ёзади Meduza компания веб-сайтига таяниб.
Янги ном электр кучланиши ўлчов бирлигини англатадиган «волт» атамасидан келиб чиққан бўлиб, у компаниянинг электромобиллар ишлаб чиқаришга йўналтирилганини акс эттириши айтилган.
«Voltswagen — бу шунчаки номни ўзгартириш эмас, балки компаниянинг оммага келажакда электромобилларни ривожлантиришга қўшадиган ҳиссаси тўғрисида маълум қилишидир», — дейилган компания хабарида.
Компаниянинг қайд этилишича, реклама, веб-сайт ва ижтимоий тармоқларда Volkswagen’нинг Америкадаги бўлими учун Voltswagen номидан фойдаланилади. Бундан ташқари, компания ишлаб чиқарадиган электромобилларга Voltswagen сўзи ёзилган ҳаворанг эмблема берилади. Ёқилғи билан юрадиган автомобиллар эски номини сақлаб қолган ҳолда VW қисқартмаси билан ҳаворанг эмблемани олиши айтилган.
Кейинчалик Volkswagen компанияси вакили The Wall Street Journal газетасига берган интервьюсида Volkswagen of America номининг ўзгартирилиши ҳақидаги маълумот 1 апрель ҳазили ва шу билан бирга компания электромобилларига омма эътиборни жалб қилишга қаратилган маркетинг ҳийла-найранги эканини маълум қилган.
Маълумот учун Volkswagen дунёдаги энг йирик электромобиллар ишлаб чиқарувчиси бўлиш режасини эълон қилган эди. 2020 йилда компания 231 мингта электромобил ишлаб чиқарди — бу ундан олдинги йилга нисбатан уч баравар кўп. Volkswagen 2030 йилга қадар 70 хил моделдаги электромобил ва 60 хил гибрид моделлар ишлаб чиқаришни йўлга қўйишни ва 2050 йилга келиб углерод нейтраллигига эришишни режалаштирмоқда.
Изоҳ (0)