Toshkentning Mirzo Ulug‘bek, Chilonzor va Yunusobod tumanidagi barcha maktablar 15-mart kuni onlayn ta’limga o‘tgan edi. Shahar Xalq ta’limi boshqarmasi mazkur maktablar qachondan an’anaviy shaklga o‘tkazilishini ma’lum qildi.
Toshkent shahar xalq ta’limi bosh boshqarmasi bo‘lim boshlig‘i Ahror Sultonovning ma’lum qilishicha, 2021-yilning 1-apreli kunidan boshlab poytaxtning Yunusobod, Chilonzor hamda Mirzo Ulug‘bek tuman xalq ta’limi bo‘limi tasarrufidagi umumta’lim maktablarida an’anaviy dars jarayonlari qayta yo‘lga qo‘yilishi ko‘zda tutilgan.
Agarda ota-onalar bolalarining sog‘lig‘idan xavotir olgan taqdirda, ta’limni onlayn tarzda davom ettirishlari mumkin. Buning uchun maktab ma’muriyatiga murojaat qilish kerak.
Qayd etilishicha, Toshkentda hozirda 445 421 nafar o‘quvchidan 154 970 nafar o‘quvchi onlayn shaklda ta’lim olmoqda.
Bundan avval Toshkent shahar hokimligi koronavirusga chalinish holatlari ko‘paygan tumandagi maktablarni onlayn ta’lim shakliga o‘tkazishi mumkinligi, ushbu epidemiologik vaziyatni inobatga olgan holda 4-chorak darslari poytaxtdagi umumta’lim maktablarida gibrid shaklda davom ettirilib, ta’lim shaklini tanlash ota-onalarga havola etilishi haqida xabar berilgandi.
Izoh (0)