29-mart kuni Oliy Majlis Senatida bo‘lib o‘tgan Korrupsiyaga qarshi kurashish Milliy kengashining navbatdagi yig‘ilishida mamlakatdagi korrupsiya holati tahlil qilindi, deb xabar beradi “UzNews.uz”
Qayd etilishicha, Korrupsiyaga qarshi kurashish agentligiga shu kunga qadar 1884 ta murojaat kelib tushgan. Murojaatchilarning 15 foizi sud, 6 foizi prokuratura organlari qarorlaridan norozi.
Shuningdek, murojaatchilarning 6 foizi mahalliy hokimliklar mansabdor shaxslari, xo‘jalik boshqaruvi va ichki ishlar organlari hamda ta’lim tizimi xodimlarining xatti-harakatlari ustidan norozilik bildirgan.
“Qonunchiligimizda anonim murojaatlar ko‘rib chiqilmasligi belgilangan. Biroq anonim murojaatlar korrupsiya yoki manfaatlar to‘qnashuvini fosh qilishga qaratilgan bo‘lsa-chi? Agentlik ushbu murojaatlarni ko‘rib chiqmoqdami?”, — degan savolni o‘rtaga qo‘ygan Tanzila Norboyeva.
Korrupsiyaga qarshi kurashish Milliy kengashi raisi uch oy muddatda Korrupsiyaga qarshi kurashish agentligi Adliya vazirligi bilan birgalikda ushbu masalani puxta o‘rganib, zarur bo‘lsa “Jismoniy va yuridik shaxslarning murojaatlari to‘g‘risida”gi qonunga o‘zgartirish kiritish bo‘yicha takliflar ishlab chiqish vazifasini bergan.
Avvalroq O‘zbekistonda 2020-yilda korrupsiya holatlari bo‘yicha 2270 kishiga nisbatan jinoiy ish ochilgani to‘g‘risida xabar berilgandi.
Izoh (0)