Тошкентнинг Мирзо Улуғбек, Чилонзор ва Юнусобод туманидаги барча мактаблар 15 март куни онлайн таълимга ўтган эди. Шаҳар Халқ таълими бошқармаси мазкур мактаблар қачондан анъанавий шаклга ўтказилишини маълум қилди.
Тошкент шаҳар халқ таълими бош бошқармаси бўлим бошлиғи Аҳрор Султоновнинг маълум қилишича, 2021 йилнинг 1 апрели кунидан бошлаб пойтахтнинг Юнусобод, Чилонзор ҳамда Мирзо Улуғбек туман халқ таълими бўлими тасарруфидаги умумтаълим мактабларида анъанавий дарс жараёнлари қайта йўлга қўйилиши кўзда тутилган.
Агарда ота-оналар болаларининг соғлиғидан хавотир олган тақдирда, таълимни онлайн тарзда давом эттиришлари мумкин. Бунинг учун мактаб маъмуриятига мурожаат қилиш керак.
Қайд этилишича, Тошкентда ҳозирда 445 421 нафар ўқувчидан 154 970 нафар ўқувчи онлайн шаклда таълим олмоқда.
Бундан аввал Тошкент шаҳар ҳокимлиги коронавирусга чалиниш ҳолатлари кўпайган тумандаги мактабларни онлайн таълим шаклига ўтказиши мумкинлиги, ушбу эпидемиологик вазиятни инобатга олган ҳолда 4-чорак дарслари пойтахтдаги умумтаълим мактабларида гибрид шаклда давом эттирилиб, таълим шаклини танлаш ота-оналарга ҳавола этилиши ҳақида хабар берилганди.
Изоҳ (0)