Xitoyda Hennes & Mauritz AB (H&M) brendining kamida oltita kiyim do‘koni ijarachining qaroriga ko‘ra yopildi. Bu haqda Bloomberg nashriga tayanib “Interfaks” xabar berdi.
Gap Urumchi, Inchuan, Chanchun va Lyanyungan shaharlaridagi do‘konlar tarmog‘i haqida ketmoqda. Mahalliy OAV H&M brendining yopilayotgan yana boshqa do‘konlari haqida ham xabar berdi.
Savdo markazlari operatorlarining aytishicha, ijarachilar do‘konlarni yopishga qaror qilgan, chunki H&M Xitoyga nisbatan hurmatsizlik qilmoqda. Avvalroq kompaniya Shinjon-Uyg‘ur muxtor viloyatida aholining majburiy mehnatga jalb qilinganini aytib, u yerda yetishtirilgan paxtalardan ortiq foydalanmasligini ta’kidlagan edi.
Do‘konlarning yopilishi H&M faoliyatiga salbiy ta’sir ko‘rsatadi. Chunki Germaniya, AQSh va Buyuk Britaniya davlatlaridan keyin Xitoy H&M uchun to‘rtinchi eng katta bozor hisoblanadi. 2020-yilda savdoning 5,2 foiz ulushi Xitoyga to‘g‘ri keldi.
2020-yilning 30-noyabr kungi holatiga ko‘ra, Xitoyda H&M kompaniyasining 505 ta do‘koni faoliyat yuritadi.
Avvalroq g‘arbning Nike Inc. va Adidas AG kabi yirik kompaniyalari ham Shinjon paxtasidan foydalanmasligini aytgan edi.
H&M do‘konlari Apple Maps va Baidu Maps navigatorlarida ko‘rinmay qoldi, natijada xaridorlar do‘konlarni topishga qiynalmoqda. Shuningdek, kompaniya mamlakatdagi eng yirik onlayn savdo platformalaridan ham o‘chirib yuborildi.
Chet el kompaniyalarida ikki tanlov bor: Shinjondan paxta sotib olishda davom etishi yoki buni rad etib, dunyoning ikkinchi eng yirik iqtisodiyotidan boykot olishi, deb yozmoqda Bloomberg. Avvalroq Germaniyaning Hugo Boss AG brendi Xitoyning Weibo ijtimoiy tarmog‘ida muxtor viloyatning paxtasini sotib olishda davom etishini yozgan edi. Lekin keyinchalik kompaniya bu sharh o‘zini oqlamaganini aytdi va post o‘chirildi.
AQSh Xitoy hukumatini Shinjon paxtasini sotib olishni rad etgan kompaniyalarga nisbatan “korporativ va iste’molchilik boykotlari”ni boshqarishda aybladi.
Shinjon-Uyg‘ur muxtor viloyati vakili Syuy Guysyan H&M’ning Shinjon masalasiga jiddiy yondashish kerakligi va o‘zining tijoriy faoliyatini siyosatga aralashtirmasligi kerakligini ta’kidladi.
H&M aksiyalari 29-mart kuni 2,3 foizga arzonlashdi.
Avvalroq AQSh Xitoydagi Shinjon qurilish va ishlab chiqarish korpusi bilan bog‘liq kompaniyalardan paxta hamda tekstil mahsulotlarining importiga taqiq qo‘ygani haqida xabar berilgan edi.
OAV va huquq himoyachilarining ma’lumotlariga ko‘ra, iyulda Adidas, Lacoste, H&M, Calvin Klein va boshqa jahon kompaniyalarining kiyim-kechaklarini ishlab chiqarishda uyg‘urlar majburiy mehnatidan foydalanilgan.
Izoh (0)