Хитойда Hennes & Mauritz AB (H&M) брендининг камида олтита кийим дўкони ижарачининг қарорига кўра ёпилди. Бу ҳақда Bloomberg нашрига таяниб «Интерфакс» хабар берди.
Гап Урумчи, Иньчуань, Чанчунь ва Ляньюнган шаҳарларидаги дўконлар тармоғи ҳақида кетмоқда. Маҳаллий ОАВ H&M брендининг ёпилаётган яна бошқа дўконлари ҳақида ҳам хабар берди.
Савдо марказлари операторларининг айтишича, ижарачилар дўконларни ёпишга қарор қилган, чунки H&M Хитойга нисбатан ҳурматсизлик қилмоқда. Аввалроқ компания Шинжон-Уйғур мухтор вилоятида аҳолининг мажбурий меҳнатга жалб қилинганини айтиб, у ерда етиштирилган пахталардан ортиқ фойдаланмаслигини таъкидлаган эди.
Дўконларнинг ёпилиши H&M фаолиятига салбий таъсир кўрсатади. Чунки Германия, АҚШ ва Буюк Британия давлатларидан кейин Хитой H&M учун тўртинчи энг катта бозор ҳисобланади. 2020 йилда савдонинг 5,2 фоиз улуши Хитойга тўғри келди.
2020 йилнинг 30 ноябрь кунги ҳолатига кўра, Хитойда H&M компаниясининг 505 та дўкони фаолият юритади.
Аввалроқ ғарбнинг Nike Inc. ва Adidas AG каби йирик компаниялари ҳам Шинжон пахтасидан фойдаланмаслигини айтган эди.
H&M дўконлари Apple Maps ва Baidu Maps навигаторларида кўринмай қолди, натижада харидорлар дўконларни топишга қийналмоқда. Шунингдек, компания мамлакатдаги энг йирик онлайн савдо платформаларидан ҳам ўчириб юборилди.
Чет эл компанияларида икки танлов бор: Шинжондан пахта сотиб олишда давом этиши ёки буни рад этиб, дунёнинг иккинчи энг йирик иқтисодиётидан бойкот олиши, деб ёзмоқда Bloomberg. Аввалроқ Германиянинг Hugo Boss AG бренди Хитойнинг Weibo ижтимоий тармоғида мухтор вилоятнинг пахтасини сотиб олишда давом этишини ёзган эди. Лекин кейинчалик компания бу шарҳ ўзини оқламаганини айтди ва пост ўчирилди.
АҚШ Хитой ҳукуматини Шинжон пахтасини сотиб олишни рад этган компанияларга нисбатан «корпоратив ва истеъмолчилик бойкотлари»ни бошқаришда айблади.
Шинжон-Уйғур мухтор вилояти вакили Сюй Гуйсян H&M’нинг Шинжон масаласига жиддий ёндашиш кераклиги ва ўзининг тижорий фаолиятини сиёсатга аралаштирмаслиги кераклигини таъкидлади.
H&M акциялари 29 март куни 2,3 фоизга арзонлашди.
Аввалроқ АҚШ Хитойдаги Шинжон қурилиш ва ишлаб чиқариш корпуси билан боғлиқ компаниялардан пахта ҳамда текстиль маҳсулотларининг импортига тақиқ қўйгани ҳақида хабар берилган эди.
ОАВ ва ҳуқуқ ҳимоячиларининг маълумотларига кўра, июлда Adidas, Lacoste, H&M, Calvin Klein ва бошқа жаҳон компанияларининг кийим-кечакларини ишлаб чиқаришда уйғурлар мажбурий меҳнатидан фойдаланилган.
Изоҳ (0)