Surxondaryo viloyati, Sho‘rchi tumanida singlisidan 137 million so‘mni firibgarlik yo‘li bilan olib, qaytarmay kelayotgan akaga jinoyat ishi qo‘zg‘atildi. Bu haqda viloyat IIB matbuot xizmati xabar berdi.
2021-yil 26-fevral kuni Jarqo‘rg‘on tumanida yashovchi ayol M.Q. tuman IIBga ariza bilan murojaat qilgan. Unda 2018-yil oktabr oyida Sho‘rchi tumanida yashovchi akasi A.B. unga yog‘ mahsulotlari savdosi bilan shug‘ullanib, foydasidan har oyga 9 million so‘mdan berib turishini va’da qilib, jami 137 million so‘m pullarni olib, bergan va’dasini bajarmasdan, ushbu pullarni o‘z ehtiyojlari uchun ishlatib yuborganligini ma’lum qilgan.
20-mart kuni o‘z singlisidan uzoq vaqtdan buyon firibgarlik yo‘li bilan olgan pullarini qaytarib bermasdan kelayotgan A.B.ga nisbatan Jinoyat kodeksining 168-moddasi 3-qismi “a” bandi (ko‘p miqdorda firibgarlik) bilan jinoyat ishi qo‘zg‘atilgan.
Ma’lumot uchun, ushbu moddada belgilangan jinoyatni sodir etganlikda aybli deb topilgan shaxs BHMning 300 baravari (73,5 million so‘m)dan 400 baravari (98 million so‘m)gacha jarima yoki 2 yildan 3 yilgacha axloq tuzatish ishlari yoxud muayyan huquqdan mahrum etilgan holda 5 yildan 8 yilgacha ozodlikdan mahrum qilish bilan jazolanadi.
Izoh (0)