Buxoro shahridagi 5-mikrorayonda qurilayotgan binoning bir qismi qulab tushgani, hodisaga binoning yaqin atrofida qazish ishlari olib borilayotgani sabab qilib ko‘rsatilgani xabar qilingandi. “Daryo” muxbiri Laylo Hayitova mazkur holat bo‘yicha surishtiruv ham olib bordi.
Buxoro shahar hokimi O‘tkir Jumayevning aytishicha, yangi qurilayotgan binoning qulab tushishiga qurilish sohasida hududiy nazorat inspeksiyasidan ruxsat olinmasdan, kotlovan qazish ishlari olib borilgani va qurilishda standartga amal qilmagani sabab bo‘lgan.
“Qolaversa, binosi qulagan tadbirkor hududda dorixona hamda mehmonxona qurishini aytib ruxsat olgan bo‘lsa-da, binodan avtomobillarni yuvish shoxobchasi sifatida foydalanib kelgan”, — deydi mas’ullar.
Aniqlanishicha, yomg‘ir suviga to‘la kotlovan atrofi temir to‘siqlar bilan o‘rab olingan.
“Daryo” muxbiri va Buxoro shahar hokimligi axborot xizmati rahbari voqea joyini ko‘zdan kechirib, tasvirga olmoqchi bo‘lib borganida o‘zini tanishtirishni ham istamagan shaxs muxbir va hokimlik xodimiga qo‘pol munosabatda bo‘lgan. Va ishchilariga ularni chiqarib yuborishi kerakligini aytgan.
Shundan so‘ng “Daryo” muxbiri o‘zini tanishtirishni ham istamagan shaxsning Buxoro shahar hokimi matbuot kotibi va jurnalist faoliyatiga to‘sqinlik qilayotgani xususida mutasaddi rahbarlarga bildirgan. Shu payt voqea joyiga viloyat rahbari Botir Zaripov, uning o‘rinbosarlari hamda tegishli tashkilot rahbarlari kelib qolgan.
Botir Zaripov hudud bilan tanishib, mutasaddi rahbarlarga holatni batafsil o‘rganib, qurilish sohasida hududiy nazorat inspeksiyasining qonuniy xulosasini taqdim etishni buyurgan.
Aniqlanishicha, bir qismi qulagan bino Buxoro shahridagi Abdurahmon Jomiy ko‘chasi yoqasida joylashgan bo‘lib, tadbirkor Lutfiya Hamroyeva tomonidan dorixona sifatida qurib bitkazilgan. Buxoro shahar qurilish bo‘limining 2020-yil 7-dekabrdagi ruxsatnomasi bilan tadbirkorga binoning birinchi qavatida dorixona, ikkinchi qavatida esa mehmonxona binosini tiklab, qayta qurishga ruxsat berilgan.
Biroq, Lutfiya Hamroyeva ART, loyiha-smeta, ekspertiza xulosasi kabi birlamchi hujjatlarni tayyorlamasdan ikki qavatli bino qurgan hamda avtomobillarni yuvish xizmatini yo‘lga qo‘ygan.
Tadbirkorga tegishli bo‘lgan binoga yondosh tomonda esa Buxoro shahrida yashovchi fuqaro Bahrom Raupov qurilish sohasida hududiy nazorat inspeksiyasi ruxsatisiz kotlovan qazish ishlarini olib borgan.
Ma’lum bo‘lishicha, tadbirkor kotlovan qazilgan 1681,0 kv/metrdan iborat yer-maydonida ko‘p xonadonli turar joy binosi qurishni maqsad qilgan. Unga 2020-yil 31-dekabrda Buxoro shahar qurilish bo‘limi tomonidan ruxsatnoma berilgan. 2021-yil 13-yanvar kuni esa viloyat Qurilish bosh boshqarmasi tomonidan hujjatlar ishlab chiqilib, “Kazar” MChJ loyiha tashkiloti tomonidan loyiha-smeta hujjatlari tayyorlangan hamda boshqarma tomonidan xulosa berilgan. Shuningdek, Buxoro viloyat qurilish bosh boshqarmasi huzuridagi “Arxitektura-shaharsozlik” kengashi tomonidan shahar hokimligi huzuridagi yer tanlash va realizatsiya qilish komissiyasining ma’lumotnomasiga asosan, obyektning joylashuvi mavjud binodan olti metr masofa saqlangan holda qurilishi kelishilgan.
“Biroq, Bahromjon Raupov ko‘p xonadonli turar joy binosi qurishda qurilish ishlari me’yoriy talablariga rioya qilmagan. Oqibatda qurilish standartiga mos bo‘lmagan, yetmagandek, tegishli tashkilotlarning ruxsatisiz qazilgan kotlovan o‘ziga yondosh bo‘lgan bino-inshootning bir qismining qulashiga sabab bo‘lgan. Ayni paytda har ikki tadbirkor bilan ham yuzma-yuz suhbat o‘tkazildi. Ular o‘zaro kelishgan holda yetkazilgan zararni qoplash masalasini ko‘rib chiqishdi. Bundan tashqari, tegishli idora-tashkilotlar tomonidan mazkur holatni izchil o‘rganish ishlari davom etadi”, — deydi Buxoro shahar hokimi.
“Daryo” voqealar rivojini kuzatishda davom etadi.
Izoh (0)