Jizzax viloyatining Mirzacho‘l tumanida davriy nashrlar obunasi uchun o‘tkazilgan pul mablag‘lari talon-toroj qilingani fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Departamentning Mirzacho‘l tuman bo‘limi tomonidan o‘tkazilgan tergovga qadar tekshiruvda tuman Xalq ta’limi bo‘limi va “H.Y.” MChJ mansabdor shaxslari oldindan til biriktirib, jamiyat hisob-raqamiga 2020—2021-yillardagi davriy nashrlarga obuna bo‘lish uchun o‘tkazilgan 192 million so‘mni tahririyatlarga o‘tkazmasdan, rastrata qilish yo‘li bilan talon-toroj qilgani aniqlangan.
Holat yuzasidan Jinoyat kodeksining 167-moddasi (talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda bandlik markazi mansabdorlari 134 million so‘m budjet mablag‘larini talon-taroj qilgani, fuqarolar nomiga rasmiylashtirilgan 215 million so‘m mikroqarzni o‘zlashtirgan MChJ rahbari va bank xodimiga jinoyat ishi qo‘zg‘atilgani, Farg‘onada kommunal to‘lovlar uchun aholidan yig‘ilgan 123 million so‘mni talon-toroj qilgan shaxslarga jinoyat ishi qo‘zg‘atilgani haqida xabar berilgan edi.
Izoh (0)