Namanganga Qirg‘iziston hukumatining Jalolobod viloyatidagi vakolatli vakili Abdusattor Sirg‘aboyev boshchiligidagi delegatsiya keldi. Bu haqda “Daryo” muxbiri Azizbek Abduvaliyev xabar bermoqda.
Jalolobod delegatsiyasi tarkibidan viloyat ma’muriyati, huquq-tartibot idoralari, sanoat korxonalari va OAV vakillari, tadbirkorlar, jami 30 nafarga yaqin kishi o‘rin oldi.
Mehmonlarni Namangan viloyati hokimi Shavkat Abdurazzoqov qabul qildi. Muzokaralar davomida ikki viloyat o‘rtasida savdo-iqtisodiy va gumanitar aloqalarni mustahkamlash, chegara punktlarini ochish xususida so‘z bordi.
Namangan shahridagi “Uch favvora” xiyobonida Namangan va Jalolobod viloyatlari “Birodar hududlar” deya e’lon qilinishiga bag‘ishlangan tantanali marosim bo‘lib o‘tdi
Marosimda Namangan va Jalolobod viloyatlari rahbarlari, Qirg‘izistonning O‘zbekistondagi favqulodda va muxtor elchisi Ibroyim Yusupov hamda keng jamoatchilik vakillari ishtirok etdi.
Tadbir davomida Namangan va Jalolobod viloyatlari o‘rtasida birodarlik rishtalari o‘rnatilganini aks ettiruvchi monument o‘rnatildi va Qirg‘iziston davlat bayrog‘i ko‘tarildi.
Qirg‘iziston delegatsiyasining tashrif dasturidan Namangandagi kichik sanoat zonalari, ishlab chiqarish korxonalari va diqqatga sazovor maskanlari bilan tanishuv, Namangan sanoat mahsulotlari ko‘rgazmasi hamda tadbirkorlarning B2B formatidagi muzokaralari o‘rin olgan.
Ma’lumot uchun, Namangan viloyatining 7 ta tumani Jalolobod viloyati bilan chegaradosh hisoblanadi. Viloyatning jami eksportida Qirg‘iziston Respublikasining ulushi 25 foizni tashkil etadi.
Izoh (0)