Qarshidagi 56 ta mahalla ko‘chalari 67 mlrd so‘mga qayta ta’mirlanadi. Zoir Mirzayev Prezidentga buning uchun 79 mlrd so‘m kerakligini aytgandi

Qashqadaryo viloyati markazi Qarshi shahridagi 56 ta mahallaning ichki ko‘chalari 67 milliard so‘m evaziga qayta ta’mirlanadi. Bu haqda “Daryo”ga viloyat hokimligi axborot xizmati ma’lum qildi.

Ta’kidlanishicha, bugun, 30-mart kuni viloyat rahbari Zoir Mirzayev bu haqdagi taqdimot bilan tanishgan.

“Qarshi shahridagi 56 ta mahalla qariyb 67 mlrd so‘m evaziga ta’mirlanadi. ‘Obod qishloq’ dasturi doirasida shaharning ‘Arabxona’ va ‘Mag‘zon’ mahallalaridagi ichki ko‘chalarga asfalt yotqiziladi”, — deyiladi hokimlik axborot xizmati taqdim etgan axborotda.

Ma’lum bo‘lishicha, taqdimotda ko‘chalarni bosqichma-bosqich ta’mirlash ishlari yo‘lga qo‘yilib, ta’mirlangan yoki ta’mirlanayotgan ko‘chalarni ranglar bilan toifalarga ajratish taklifi o‘rtaga tashlangan.

Viloyat hokimligi axborot xizmatining qo‘shimcha qilishicha, 2021-yil shaharda 44 km piyodalar, 12 km velosiped yo‘lakchasi quriladi. 23 ta ko‘chaga esa yoritish uskunalari o‘rnatiladi.

Eslatib o‘tamiz, avvalroq viloyat hokimi Zoir Mirzayev Qarshi shahridagi ko‘chalarni ta’mirlash uchun 79 milliard so‘m kerak bo‘lishi haqida Prezidentga hisobot bergani ma’lum qilingandi.