Бухоро шаҳридаги 5-микрораёнда қурилаётган бинонинг бир қисми қулаб тушгани, ҳодисага бинонинг яқин атрофида қазиш ишлари олиб борилаётгани сабаб қилиб кўрсатилгани хабар қилинганди. «Дарё» мухбири Лайло Ҳайитова мазкур ҳолат бўйича суриштирув ҳам олиб борди.
Бухоро шаҳар ҳокими Ўткир Жумаевнинг айтишича, янги қурилаётган бинонинг қулаб тушишига қурилиш соҳасида ҳудудий назорат инспекциясидан рухсат олинмасдан, котлован қазиш ишлари олиб борилгани ва қурилишда стандартга амал қилмагани сабаб бўлган.
«Қолаверса, биноси қулаган тадбиркор ҳудудда дорихона ҳамда меҳмонхона қуришини айтиб рухсат олган бўлса-да, бинодан автомобилларни ювиш шохобчаси сифатида фойдаланиб келган», — дейди масъуллар.
Аниқланишича, ёмғир сувига тўла котлован атрофи темир тўсиқлар билан ўраб олинган.
«Дарё» мухбири ва Бухоро шаҳар ҳокимлиги ахборот хизмати раҳбари воқеа жойини кўздан кечириб, тасвирга олмоқчи бўлиб борганида ўзини таништиришни ҳам истамаган шахс мухбир ва ҳокимлик ходимига қўпол муносабатда бўлган. Ва ишчиларига уларни чиқариб юбориши кераклигини айтган.
Шундан сўнг «Дарё» мухбири ўзини таништиришни ҳам истамаган шахснинг Бухоро шаҳар ҳокими матбуот котиби ва журналист фаолиятига тўсқинлик қилаётгани хусусида мутасадди раҳбарларга билдирган. Шу пайт воқеа жойига вилоят раҳбари Ботир Зарипов, унинг ўринбосарлари ҳамда тегишли ташкилот раҳбарлари келиб қолган.
Ботир Зарипов ҳудуд билан танишиб, мутасадди раҳбарларга ҳолатни батафсил ўрганиб, қурилиш соҳасида ҳудудий назорат инспекциясининг қонуний хулосасини тақдим этишни буюрган.
Аниқланишича, бир қисми қулаган бино Бухоро шаҳридаги Абдураҳмон Жомий кўчаси ёқасида жойлашган бўлиб, тадбиркор Лутфия Ҳамроева томонидан дорихона сифатида қуриб битказилган. Бухоро шаҳар қурилиш бўлимининг 2020 йил 7 декабрдаги рухсатномаси билан тадбиркорга бинонинг биринчи қаватида дорихона, иккинчи қаватида эса меҳмонхона биносини тиклаб, қайта қуришга рухсат берилган.
Бироқ, Лутфия Ҳамроева АРТ, лойиҳа-смета, экспертиза хулосаси каби бирламчи ҳужжатларни тайёрламасдан икки қаватли бино қурган ҳамда автомобилларни ювиш хизматини йўлга қўйган.
Тадбиркорга тегишли бўлган бинога ёндош томонда эса Бухоро шаҳрида яшовчи фуқаро Баҳром Раупов қурилиш соҳасида ҳудудий назорат инспекцияси рухсатисиз котлован қазиш ишларини олиб борган.
Маълум бўлишича, тадбиркор котлован қазилган 1681,0 кв/метрдан иборат ер майдонида кўп хонадонли турар жой биноси қуришни мақсад қилган. Унга 2020 йил 31 декабрда Бухоро шаҳар қурилиш бўлими томонидан рухсатнома берилган. 2021 йил 13 январь куни эса вилоят Қурилиш бош бошқармаси томонидан ҳужжатлар ишлаб чиқилиб, «Казар» МЧЖ лойиҳа ташкилоти томонидан лойиҳа-смета ҳужжатлари тайёрланган ҳамда бошқарма томонидан хулоса берилган. Шунингдек, Бухоро вилоят қурилиш бош бошқармаси ҳузуридаги «Архитектура-шаҳарсозлик» кенгаши томонидан шаҳар ҳокимлиги ҳузуридаги ер танлаш ва реализация қилиш комиссиясининг маълумотномасига асосан, объектнинг жойлашуви мавжуд бинодан олти метр масофа сақланган ҳолда қурилиши келишилган.
«Бироқ, Баҳромжон Раупов кўп хонадонли турар жой биноси қуришда қурилиш ишлари меъёрий талабларига риоя қилмаган. Оқибатда қурилиш стандартига мос бўлмаган, етмагандек, тегишли ташкилотларнинг рухсатисиз қазилган котлован ўзига ёндош бўлган бино-иншоотнинг бир қисмининг қулашига сабаб бўлган. Айни пайтда ҳар икки тадбиркор билан ҳам юзма-юз суҳбат ўтказилди. Улар ўзаро келишган ҳолда етказилган зарарни қоплаш масаласини кўриб чиқишди. Бундан ташқари, тегишли идора-ташкилотлар томонидан мазкур ҳолатни изчил ўрганиш ишлари давом этади», — дейди Бухоро шаҳар ҳокими.
«Дарё» воқеалар ривожини кузатишда давом этади.
Изоҳ (0)