Yaponiyaning g‘arbiy hududlarini 29-mart kuni qalin qum bo‘roni qopladi. Bu haqda NHK telekanaliga tayanib, “Ukrinform.ru” xabar berdi.
Qum bo‘roni Mattsu, Xirosima va Okayama hududlarini qamrab oldi. Meteorologlar bu hududlarda kuchli shamol esayotganini xabar qilmoqda.
30-martgacha bo‘ron asta-sekin Yaponiyaning sharqiy va shimoliy hududlarida harakatini davom ettirishi kutilmoqda.
Yonhap nashrining yozishicha, qum bo‘roni Janubiy Koreyaning deyarli barcha mintaqalarini, shuningdek, poytaxt Seul shahrini ham qamrab oldi. Mahalliy rasmiylar havodagi chang zarralarining nihoyatda yuqori bo‘lishidan ogohlantirmoqda.
Meteorologlarning qo‘shimcha qilishicha, qum bo‘roni 26-mart kuni Xitoyning shimoli va Mo‘g‘ulistonning janubida joylashgan Gobi sahrosida boshlangan. Hozirgacha u Janubiy Koreya va Yaponiyagacha yetib bordi.
Avvalroq Xitoy poytaxti Pekin so‘nggi o‘n yil ichidagi eng kuchli qum bo‘roniga duch kelgani haqida xabar berildi. Poytaxtdagi ikkita aeroport 400 ga yaqin aviareysni bekor qildi — Shoudu xalqaro aeroportida 15-martga rejalashtirilgan 1141 ta aviareysning 247 tasi, Dasin aeroportida 846 ta aviareysdan 181 tasi. Meteorologlarning prognozlariga ko‘ra, bo‘ron 16-mart tongiga qadar davom etadi hamda mamlakatdagi 12 ta viloyat va mintaqaga — Shinjon-Uyg‘ur avtonom viloyatidan to Rossiya chegarasidagi shimoliy-sharqiy Xeylunszyan viloyatigacha o‘z ta’sirini o‘tkazadi.
Keyinroq Xitoyda ikki hafta ichida ikkinchi bor qum bo‘roni sodir bo‘ldi. Xitoy Markaziy meteorologiya xizmatining xabar berishicha, tabiiy ofat Ichki Mo‘g‘uliston, Shansi, Xebey, Liyaonin provinsiyalari hamda poytaxt Pekin va Tyanszin shahriga o‘z ta’sirini o‘tkazdi. Pekinning aksariyat qismida sovuq havo tufayli shimoldan kuchli shamol esishi kutilmoqda. Poytaxtda minimal ko‘rish masofasi, taxminan, 1000 metrni tashkil qiladi. Ta’kidlanishicha, bo‘ron 12 soatdan ko‘proq davom etib, yakshanba kuni kechasi to‘xtaydi.
Izoh (0)