Япония ва Жанубий Кореяни қум бўрони қоплади (фото)

Япониянинг ғарбий ҳудудларини 29 март куни қалин қум бўрони қоплади. Бу ҳақда NHK телеканалига таяниб, «Ukrinform.ru» хабар берди.

Қум бўрони Матцу, Хиросима ва Окаяма ҳудудларини қамраб олди. Метеорологлар бу ҳудудларда кучли шамол эсаётганини хабар қилмоқда.

30 мартгача бўрон аста-секин Япониянинг шарқий ва шимолий ҳудудларида ҳаракатини давом эттириши кутилмоқда.

Yonhap нашрининг ёзишича, қум бўрони Жанубий Кореянинг деярли барча минтақаларини, шунингдек, пойтахт Сеул шаҳрини ҳам қамраб олди. Маҳаллий расмийлар ҳаводаги чанг зарраларининг ниҳоятда юқори бўлишидан огоҳлантирмоқда.

Метеорологларнинг қўшимча қилишича, қум бўрони 26 март куни Хитойнинг шимоли ва Мўғулистоннинг жанубида жойлашган Гоби саҳросида бошланган. Ҳозиргача у Жанубий Корея ва Япониягача етиб борди.

Аввалроқ Хитой пойтахти Пекин сўнгги ўн йил ичидаги энг кучли қум бўронига дуч келгани ҳақида хабар берилди. Пойтахтдаги иккита аэропорт 400 га яқин авиарейсни бекор қилди — Шоуду халқаро аэропортида 15 мартга режалаштирилган 1141 та авиарейснинг 247 таси, Дасин аэропортида 846 та авиарейсдан 181 таси. Метеорологларнинг прогнозларига кўра, бўрон 16 март тонгига қадар давом этади ҳамда мамлакатдаги 12 та вилоят ва минтақага — Шинжон-Уйғур автоном вилоятидан то Россия чегарасидаги шимолий-шарқий Хейлунсзян вилоятигача ўз таъсирини ўтказади.

Кейинроқ Хитойда икки ҳафта ичида иккинчи бор қум бўрони содир бўлди. Хитой Марказий метеорология хизматининг хабар беришича, табиий офат Ички Мўғулистон, Шаньси, Хэбэй, Лияонин провинциялари ҳамда пойтахт Пекин ва Тяньцзинь шаҳрига ўз таъсирини ўтказди. Пекиннинг аксарият қисмида совуқ ҳаво туфайли шимолдан кучли шамол эсиши кутилмоқда. Пойтахтда минимал кўриш масофаси, тахминан, 1000 метрни ташкил қилади. Таъкидланишича, бўрон 12 соатдан кўпроқ давом этиб, якшанба куни кечаси тўхтайди.