Qashqadaryoda 8-sinf o‘quvchisini zo‘rlagan va qizning homiladorligini bilgach, unga o‘zini o‘ldirish usullarini o‘rgatgani aytilgan fuqaro javobgarlikka tortilmasligi ma’lum bo‘ldi
Qashqadaryo viloyatining Qamashi tumanida 8-sinf o‘quvchisini zo‘rlagan va qizning homilasi borligini bilgach, unga o‘zini o‘ldirish usullarini o‘rgatgan fuqaro javobgarlikdan qutulib qoladigan bo‘ldi. Bu haqda viloyat IIB axborot xizmatining rasmiy munosabati ma’lum qilindi.
Qashqadaryodagi mas’ul tashkilot axborot xizmatining yozishicha, Qamashi tumanining “Chim” mahallasida joylashgan maktab o‘quvchisi S.S. 2019-yil 8-sinfda tahsil olayotgan paytida tengdoshi N.Sh. bilan jinsiy aloqa qilib, homilador bo‘lib qolganini, jinoyat sodir etgan shaxs oradan shuncha vaqt o‘tgan bo‘lsa ham jazoga tortilmaganini bayon qilgan.
Aniqlanishicha, holat yuzasidan Qamashi tuman IIB huzuridagi tergov bo‘limi tomonidan 2020-yil 6-mart kuni Jinoyat kodeksining 128-moddasi (o‘n olti yoshga to‘lmagan shaxs bilan jinsiy aloqa qilish) bilan jinoyat ishi qo‘zg‘atilib, tergov harakatlari olib borilgan.Tergov davomida, N.Sh. ijtimoiy xavfli qilmish sodir etgan paytda jinoiy javobgarlikka tortish mumkin bo‘lgan yoshga to‘lmagani sabab Jinoyat protssessual kodeksining 84-moddasi 1-qismi 7-bandiga ko‘ra, ayblilik to‘g‘risidagi masalani hal qilmay turib, jinoyat ishi harakatdan tugatilgan.Demak, viloyat IIBga ko‘ra, shu jinoyatni sodir etgan shaxs jinoyat sodir etilgan paytda jinoiy javobgarlikka tortish mumkin bo‘lmagan yoshda bo‘lgani sabab javobgarlikdan qutulib qoladi.
Qashqadaryo viloyat prokuraturasi axborot xizmati rahbari Jasur Shukurovning “Daryo”ga ma’lumot berishicha, viloyat prokuraturasi Qamashi tuman IIB tergovchisining dastlabki xulosasi qonuniyligini o‘rgangan.
“O‘rganishlar natijasiga ko‘ra, IIB tergovchisining dastlabki xulosasi qonuniy ekani ma’lum bo‘ldi”, — deydi Jasur Shukurov.
“Bola voyaga yetganidan so‘ng qilmishi uchun javob beradimi yoki yo‘qmi?”, — degan savolga Qamashi tuman prokurori Husniddin Bobomurodov: “Yo‘q, javobgarlikka tortilmaydi”, — deya javob berdi.
