Бекободда пул ўғирлаган қизни ҳақорат қилиб, унга зўравонлик қилган эркакка нисбатан жиноий иш қўзғатилди, дея хабар бермоқда Тошкент вилояти ИИББ.
Қайд этилишича, 28 март куни ижтимоий тармоқда «Бекободда 50 минг сўм пулини ўғирлагани учун жазоланди» изоҳи билан видеохабар тарқалди.
Ушбу ҳолат Тошкент вилояти ИИББ назоратида Бекобод шаҳар ИИБ ходимлари томонидан ўрганилиб, қонуний чора кўрилиши таъминланди.
Тафсилотга кўра, воқеа аслида 2021 йил 13 март куни Бекобод шаҳрида содир бўлган. «Хос» жамоавий хўжалигида яшовчи, 1995 йилда туғилган Б.Х. ўзига олдиндан таниш бўлган 1999 йилда туғилган Ф.Х.нинг хонадонига маст ҳолда борган ва у ерда фуқаро Ф.Х.ни ҳар хил сўзлар билан ҳақорат қилиб, уриб, ғайритабиий йўл билан жинсий эҳтиёжини қондиришга ҳаракат қилган.
Ушбу жараёнда воқеа видеотасвирга олиниб, ижтимоий тармоқда тарқатилган.
Бекобод шаҳар Тиббиёт бирлашмасининг 28 март кунидаги тиббий маълумотномасига кўра, фуқаро Ф.Х.нинг чап қўл елка соҳасида тан жароҳатлари борлиги аниқланган.
Мазкур ҳолат юзасидан Б.Х.га нисбатан Бекобод шаҳар ИИБ Тергов бўлими томонидан Ўзбекистон Республикаси Жиноят кодексининг 119-моддаси 1-қисми (жинсий эҳтиёжни зўрлик ишлатиб, ғайритабиий усулда қондириш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Бундан аввал Тошкентда 10 ёшли боланинг номусига тегишга урингани айтилган такси ҳайдовчиси ушлангани, Нурафшонда вояга етмаган болани зўрлашда айбланаётган фуқаро суд биносидан қочиб кетгани ҳамда Қашқадарёда 8-синф ўқувчисини зўрлаган ва қизнинг ҳомиладорлигини билгач, унга ўзини ўлдириш усулларини ўргатгани айтилган фуқаро жавобгарликка тортилмаслиги маълум бўлгани ҳақида хабар берилганди.
Изоҳ (0)