Toshkent shahrida 28-mart, yakshanba kuni har yili Navro‘z bayramiga bag‘ishlab o‘tkaziladigan Toshkent xalqaro marafoni start oldi.
Ochilish marosimidan so‘ng dastlab marafon va yarimmarafon, ekiden marafon va 3 kilometr masofaga o‘tkaziladigan bellashuv ishtirokchilari navbatma-navbat startga chiqdi. Bu yilgi poygalar hisob bo‘yicha tarixdagi uchinchisi hisoblanadi.
Marafonchilar 42,195 km masofani bosib o‘tishi kerak bo‘ladi. Humo Arena’dan startga chiqqan ishtirokchilar Afrosiyob, Abay, Nukus, Abdulla Qodiriy va Shahrisabz ko‘chalaridan o‘tadi.
Shuningdek, marafon doirasida quyidagi masofalarga yugurish rejalashtirilgan: yarim marafon 21 km 097,5 m), poyga (3 km), ekiden (5 km + 10 km + 5 km + 10 km + 5 km + 7,195 km).
Ekiden — marafon estafetasi bo‘lib, masofa 6 bosqichda bosib o‘tiladi va quyidagi tartibda taqsimlanadi: 5 km, 10 km, 5 km, 10 km, 5 km, 7,195 km. Bunda jamoaning har bir ishtirokchisi alohida belgilangan masofani bosib o‘tadi.
Marafon va yarimmarafonda 18 yosh va undan kattalar ishtirok etishi mumkin. 3 kilometrlik ekidenda esa yosh chegaralanmagan.
Marafon g‘oliblarini taqdirlash quyidagi tartibda amalga oshiriladi:
- Marafon — 1-o‘rindan 6-o‘ringacha (1-o‘rin — 20 mln so‘m, 2-o‘rin — 14 mln so‘m, 3-o‘rin — 8 mln so‘m, 4-o‘rin — 6 mln so‘m, 5-o‘rin— 4 mln so‘m, 6-o‘rin — 3 mln so‘m).
- Yarimmarafon — 1-dan 3-o‘ringacha (1-o‘rin — 9 mln so‘m, 2-o‘rin — 6 mln so‘m, 3-o‘rin — 3 mln so‘m);
- Ekiden — erkaklar va ayollar jamoalari o‘rtasida 1-o‘rindan 3-o‘ringacha (1-o‘rin — 9 mln so‘m, 2-o‘rin — 6 mln so‘m, 3-o‘rin — 3 mln so‘m).
- Shuningdek, masofani belgilangan muddat (5 soat-u 30 daqiqa) ichida bosib o‘tgan barcha ishtirokchilar maxsus medal bilan taqdirlanadi.
Quyida Toshkentda bo‘lib o‘tayotgan marafondan olingan suratlar to‘plami havola etiladi.
Izoh (0)