Фото: Пойтахтда старт олган III Тошкент халқаро марафони

Тошкент шаҳрида 28 март, якшанба куни ҳар йили Наврўз байрамига бағишлаб ўтказиладиган Тошкент халқаро марафони старт олди.

Очилиш маросимидан сўнг дастлаб марафон ва яриммарафон, экиден марафон ва 3 километр масофага ўтказиладиган беллашув иштирокчилари навбатма-навбат стартга чиқди. Бу йилги пойгалар ҳисоб бўйича тарихдаги учинчиси ҳисобланади.

Марафончилар 42,195 км масофани босиб ўтиши керак бўлади. Humo Аrena’дан стартга чиққан иштирокчилар Афросиёб, Абай, Нукус, Абдулла Қодирий ва Шаҳрисабз кўчаларидан ўтади.

Шунингдек, марафон доирасида қуйидаги масофаларга югуриш режалаштирилган: ярим марафон 21 км 097,5 м), пойга (3 км), экиден (5 км + 10 км + 5 км + 10 км + 5 км + 7,195 км).

Экиден — марафон эстафетаси бўлиб, масофа 6 босқичда босиб ўтилади ва қуйидаги тартибда тақсимланади: 5 км, 10 км, 5 км, 10 км, 5 км, 7,195 км. Бунда жамоанинг ҳар бир иштирокчиси алоҳида белгиланган масофани босиб ўтади.

Марафон ва яриммарафонда 18 ёш ва ундан катталар иштирок этиши мумкин. 3 километрлик экиденда эса ёш чегараланмаган.

Марафон ғолибларини тақдирлаш қуйидаги тартибда амалга оширилади:

• Марафон — 1-ўриндан 6-ўрингача (1-ўрин — 20 млн сўм, 2-ўрин — 14 млн сўм, 3-ўрин — 8 млн сўм, 4-ўрин — 6 млн сўм, 5-ўрин— 4 млн сўм, 6-ўрин — 3 млн сўм).
• Яриммарафон — 1-дан 3-ўрингача (1-ўрин — 9 млн сўм, 2-ўрин — 6 млн сўм, 3-ўрин — 3 млн сўм);
• Экиден — эркаклар ва аёллар жамоалари ўртасида 1-ўриндан 3-ўрингача (1-ўрин — 9 млн сўм, 2-ўрин — 6 млн сўм, 3-ўрин — 3 млн сўм).
• Шунингдек, масофани белгиланган муддат (5 соат-у 30 дақиқа) ичида босиб ўтган барча иштирокчилар махсус медал билан тақдирланади.

Қуйида Тошкентда бўлиб ўтаётган марафондан олинган суратлар тўплами ҳавола этилади.