Internetda eng sekin dreg-poygalardan biri tasvirlangan video paydo bo‘ldi: armiya uchun mo‘ljallangan sakkiz g‘ildirakli Oshkosh HEMTT va uchta avtomobil ortilgan tirkama ulangan Ford F-450 mashinasi bir-biri bilan bellashdi. Bellashuv yakunida Amerika pikapi g‘olib bo‘lgan. Bundan tashqari, poygada aerodrom o‘t o‘chirish mashinasi ham ishtirok etgan bo‘lib, u inson bilan kuch sinashgan, deb xabar beradi Motor.
To‘liq uzatmali Ford F-450 pikapiga 475 ot kuchiga ega 6,7 litrli V8 dizel dvigateli o‘rnatilgan. Agregat olti pog‘onali avtomat uzatmalar qutisi yordamida boshqariladi. Pikap og‘irligi 12,7 ming kilogrammni tashkil etadi. Poyga uchun Ford’ga maxsus tirkama ulangan bo‘lib, uning ustida eski BMW sedani va ikkita harbiy yo‘ltanlamas ortilgan. Shu sababli poyga ishtirokchisining aniq massasi noma’lum.
Pikapga armiya uchun mo‘ljallangan 17,7 ming kilogrammli Oshkosh HEMTT yuk mashinasi raqobatchilik qilgan. AQSh harbiylari uchun mo‘ljallangan sakkiz g‘ildirakli mashina 360 ot kuchiga ega 12,1 litrli motor yordamida harakatga keladi. Agregat to‘rt pog‘onali avtomat transmissiya yordamida boshqariladi. Yuk mashinasining maksimal tezligi soatiga 100 kilometr.
Uzoq kutishga to‘g‘ri kelmasligi uchun dreg-poyga 150 metr masofaga tashkil etgan. Birinchi urinishda avtovoz ulangan Ford F-450 katta farq bilan finishga birinchi bo‘lib kelgan. Ikkinchi urinishda ham armiya mashinasi muvaffaqiyatsizlikka uchragan — pikap yana birinchi.
Bundan tashqari, ishqibozlar Oshkosh HEMTT va aerodrom uchun mo‘ljallangan olti g‘ildirakli o‘t o‘chirish mashinasi o‘rtasida ham poyga uyushtirgan. Ushbu bellashuvda harbiy yuk mashinasi g‘olib bo‘lgan. Poygalarning birida og‘ir o‘t o‘chirish mashinasi bilan suratga olish guruhi a’zolaridan biri bellashgan. Erkak startda yugurib, ancha odimlab ketgan, biroq finish chizig‘iga baribir aerodrom texnikasi birinchi bo‘lib yetib kelgan.
Avvalroq YouTube’dagi Carwow kanali blogerlari yangi Land Rover Defender, Mercedes-Benz G-Class va Jeep Wrangler Rubicon modellarining yuk tortish qobiliyatini sinab ko‘rgani to‘g‘risida xabar berilgandi.
Izoh (0)