Namanganda Isuzu yuk mashinasi piyodani urib yubordi. Jabrlanuvchi shifoxonada vafot etdi

Namanganda Isuzu yuk mashinasi yo‘lni kesib o‘tayotgan piyodani urib yuborib, uning o‘limiga sabab bo‘ldi.

IIV matbuot xizmatining xabar berishicha, voqea 21-mart kuni soat 23:40 larda, Pungon—Namangan yo‘lining 66 kilometrida yuz bergan. Yuk mashinasini ishonch qog‘ozi bilan boshqarib ketayotgan haydovchi harakat xavfsizligini ta’minlay olmay, yo‘lni kesib o‘tayotgan piyodani urib yuborgan.

Oqibatda piyoda og‘ir tan jarohati olib, shifoxonada ko‘rsatilgan tez tibbiy yordamga qaramay, vafot etgan.

Holat yuzasidan To‘raqo‘rg‘on tuman IIB huzuridagi TB tomonidan 22-mart kuni Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.

Avvalroq Toshkentda opera va balet teatrining ikki xodimini teatr yonida mashina urib ketgani, ulardan biri vafot etgani haqida xabar berilgan edi. Holat yuzasidan jinoyat ishi qo‘zg‘atilgan.

Shuningdek, Toshkentda Mercedes-Benz urib ketgan ikki piyodadan biri halok bo‘lgani, Andijonda ikki Nexia yo‘lni kesib o‘tayotgan velosipedchini urib ketgani, Navoiyda yo‘lning belgilanmagan qismidan kesib o‘tgan mast piyoda Nexia urib ketishi oqibatida vafot etgani haqida xabar berilgan edi.