Jinoyat ishlari bo‘yicha To‘raqo‘rg‘on tuman sudi tomonidan kriminogen vaziyati og‘ir hududlar toifasiga kiritilgan “Buramatut” mahallasida sayyor sud majlisi o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Shu yerning o‘zida 25 kishiga nisbatan yuritilgan ma’muriy huquqbuzarlik ishi va 3 nafar shaxsga taalluqli jinoyat ishi ko‘rib chiqildi.
Xususan, akasini ikki bor pichoqlagan No‘mon Nosirovning (ism-shariflar o‘zgartirilgan) ishi barchaning e’tiborini tortdi. Tumanning “Qodirobod” mahallasida yashovchi 37 yashar Karim Nosirovning o‘zi bilan bir hovlida yashovchi ukasi, 31 yoshli No‘mon Nosirov bilan dahanaki tortishuvi ayanchli yakunlandi. Jahlini jilovlay olmagan uka oshxona pichog‘i bilan avval akasining chap yelkasi, so‘ng ko‘krak qismiga zarba beradi.
Ularni qo‘shnisi ajratib qoladi. Karimjon qo‘shnisining mashinasida qishloq vrachlik punktiga yetkaziladi. Bu yerda shifokorlar jabrdiydaga birinchi yordam ko‘rsatadi.
Shundan so‘ng Karim Nosirov ichki ishlar idoralariga murojaat qildi. Olib borilgan surishtiruv va tergov ishlari natijasida No‘mon Nosirov Jinoyat kodeksining 109-moddasi 2-qismida nazarda tutilgan jinoyatni sodir etganlikda ayblandi.
Mazkur jinoyat ishi sayyor sud majlisida ko‘rib chiqilib, No‘mon Nosirov akasiga yetkazilgan moddiy zararni to‘liq qoplagani, qilmishidan pushaymon ekanligi, harakatining ijtimoiy xavfini tushunib yetganligi va jabrlanuvchining yarashuvga roziligi sababli jinoyat ishi harakatdan tugatildi.
“Sayyor sud majlisida 4 nafar shaxsga ma’muriy qamoq jazosi tayinlandi, 21 kishiga jarima va boshqa huquqiy choralar ko‘rildi. 3 ta jinoyat ishi esa yetkazilgan zararlar bartaraf etilganligi sababli yarashuv bilan tugatildi”, — deydi Jinoyat ishlari bo‘yicha To‘raqo‘rg‘on tuman sudi raisi Zayniddin To‘rayev.
Izoh (0)