Жиноят ишлари бўйича Тўрақўрғон туман суди томонидан криминоген вазияти оғир ҳудудлар тоифасига киритилган «Бураматут» маҳалласида сайёр суд мажлиси ўтказилди. Бу ҳақда «Дарё» мухбири Азизбек Абдувалиев хабар бермоқда.
Шу ернинг ўзида 25 кишига нисбатан юритилган маъмурий ҳуқуқбузарлик иши ва 3 нафар шахсга тааллуқли жиноят иши кўриб чиқилди.
Хусусан, акасини икки бор пичоқлаган Нўмон Носировнинг (исм-шарифлар ўзгартирилган) иши барчанинг эътиборини тортди. Туманнинг «Қодиробод» маҳалласида яшовчи 37 яшар Карим Носировнинг ўзи билан бир ҳовлида яшовчи укаси, 31 ёшли Нўмон Носиров билан даҳанаки тортишуви аянчли якунланди. Жаҳлини жиловлай олмаган ука ошхона пичоғи билан аввал акасининг чап елкаси, сўнг кўкрак қисмига зарба беради.
Уларни қўшниси ажратиб қолади. Каримжон қўшнисининг машинасида қишлоқ врачлик пунктига етказилади. Бу ерда шифокорлар жабрдийдага биринчи ёрдам кўрсатади.
Шундан сўнг Карим Носиров ички ишлар идораларига мурожаат қилди. Олиб борилган суриштирув ва тергов ишлари натижасида Нўмон Носиров Жиноят кодексининг 109-моддаси 2-қисмида назарда тутилган жиноятни содир этганликда айбланди.
Мазкур жиноят иши сайёр суд мажлисида кўриб чиқилиб, Нўмон Носиров акасига етказилган моддий зарарни тўлиқ қоплагани, қилмишидан пушаймон эканлиги, ҳаракатининг ижтимоий хавфини тушуниб етганлиги ва жабрланувчининг ярашувга розилиги сабабли жиноят иши ҳаракатдан тугатилди.
«Сайёр суд мажлисида 4 нафар шахсга маъмурий қамоқ жазоси тайинланди, 21 кишига жарима ва бошқа ҳуқуқий чоралар кўрилди. 3 та жиноят иши эса етказилган зарарлар бартараф этилганлиги сабабли ярашув билан тугатилди», — дейди Жиноят ишлари бўйича Тўрақўрғон туман суди раиси Зайниддин Тўраев.
Изоҳ (0)