DXX va Iqtisodiy jinoyatlarga qarshi kurashish departamentining Toshkent shahar boshqarmasi xodimlari Toshkentda xalqaro avtobuslar qatnovini yo‘lga qo‘yib berishni va’da qilib, 5000 dollar pora olgan shaxs ushlandi, deb xabar beradi “Xabar.uz”.
Ma’lumotlarga ko‘ra, Transport vazirligi tarkibidagi “Uzavtotrans servis” MChJda bo‘lim boshlig‘i lavozimida ishlovchi T.A. Rossiya fuqarosi bo‘lgan A.V.ga tegishli xalqaro yo‘lovchi tashish bilan shug‘ullanuvchi MChJ avtobuslarining Toshkent–Samara shaharlari o‘rtasida charter qatnovlarini yo‘lga qo‘yish uchun mansabdor tanishlari orqali yordam berishni va’da qilgan. U o‘z xizmati evaziga 2020-yilning iyul oyida undan 5000 dollar olgan.
Biroq T.A. va’dasining ustidan chiqa olmagach, pulning 2700 dollarini qaytarib, turli bahonalar bilan qolgan 2300 dollarini bermay kelgan.
Aldanganini tushunib yetgan jabrlanuvchi huquq-tartibot idoralariga murojaat qilgan.
O‘tkazilgan tezkor tadbir davomida T.A. muqaddam olgan pulining 300 dollarini qaytarib bergan vaqtida ashyoviy dalillar bilan ushlangan. Hozirda unga nisbatan Jinoyat kodeksining 168-moddasiga (firibgarlik) muvofiq jinoyat ishi qo‘zg‘atilib, tergov harakatlari olib borilmoqda.
Avvalroq Buxoroda Rossiyaga borish uchun soxta aviachipta tayyorlash bilan shug‘ullangan ikki kishiga jinoyat ishi qo‘zg‘atilgani to‘g‘risida xabar berilgandi.
Izoh (0)