Toshkentdagi Respublika shoshilinch tibbiy yordam ilmiy markazining toksikologiya qabul bo‘limida ishlovchi shifokor ayolga mast erkak tomonidan jiddiy jarohat yetkazildi, deya xabar bermoqda Sog‘liqni saqlash vazirligi matbuot xizmati.
Ma’lum qilinishicha, 2021-yilning 24-mart kuni soat 23:15 larda Respublika shoshilinch tibbiy yordam ilmiy markazining toksikologiya qabul bo‘limiga poytaxtning Olmazor tumanida istiqomat qiluvchi 37 yoshli fuqaro U.N. onasi hamrohligida tekshiruvga olib kelingan.
Bemorning onasi toksikolog xonasida o‘z xizmat faoliyatini o‘tayotgan navbatchi shifokor N.T.ga o‘g‘li bir necha kundan beri spirtli ichimlik ichayotganini bildirgan.
Navbatchi shifokor o‘sha vaqtda boshqa bemorni tibbiy ko‘rikdan o‘tkazayotganini va bundan so‘ng ularni ham qabul qilib, kerakli yordam ko‘rsatishga tayyorligini bildirgan.
Shunga qaramay, bemorning onasi tibbiyot xodimlariga nisbatan turli haqoratli va tuhmat so‘zlar bilan e’tiroz bildirishni boshlagan. Bu ham yetmagandek bemor U.N. to‘satdan shifokor N.T.ga og‘ir tan jarohati yetkazgan.
“Shifokor N.T.da bosh miya shishi asorati kuzatilib, ‘Qo‘shma kraniofatsial jarohat. Og‘ir darajadagi bosh miya yopiq jarohati. Bosh miya og‘ir darajada lat yeyishi. Subaraxnoidal qon quyulishi. Burun suyaklari va burun to‘sig‘i sinib siljishi. Ensa va burun sohalarni yumshoq to‘qimalarining lat yeyishi. Nazogemorreya’ tashxisi bilan neyroreanimatsiya bo‘limiga yotqizildi. Ayni paytda u kuchli karaxtlik darajasida bo‘lib, og‘ir ahvolda davolanmoqda. Bemor atrofdagilarga sekin reaksiya berib, muloqotga kirishishga qiynalmoqda”, — deydi ushbu markaz direktori Doniyor Alimov.
Ma’lum qilinishicha, xizmat vazifasi vaqtida bemor tomonidan nohaq kaltaklangan shifokor N.T. 2017-yildan buyon shifokor-toksikolog lavozimida ishlab kelmoqda, o‘z xizmat vazifasini klinik protokollarga rioya qilib, talab darajasida bajarib kelgan.
Sog‘liqni saqlash vazirligi huquq-tartibot organlaridan shifokorlarning haq-huquqlarini qat’iy himoya qilishlarini talab qilgan.
Bundan avval Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangani, Samarqandda shifoxona qorovuli va shifokorini urgan shaxsga nisbatan jinoyat ishi qo‘zg‘atilgani hamda Farg‘onada tez yordam xodimlarini kaltaklagan shaxs qamoqqa olingani haqida xabar berilgandi.
Izoh (0)