O‘zbekiston fuqarolarini Janubiy Koreyaga jo‘natish bo‘yicha firibgarlikka yo‘l qo‘ygan Korean and migrations xususiy bandlik agentligining mansabdor shaxslariga nisbatan qo‘zg‘atilgan jinoyat ishi bo‘yicha sud jarayoni 2020-yil 14-sentabr kuni nihoyasiga yetgani va sud hukmi e’lon qilingani haqida xabar berilgandi. Ushbu agentlik mutasaddilari turli muddatlarga ozodlikdan mahrum qilinib, jabrlanuvchilarga yetkazilgan moddiy zarar undirish belgilangandi.
Ijtimoiy tarmoqlarda MIB Korean and migrations xususiy bandlik agentligidan jabr ko‘rgan fuqarolarning yetkazilgan zararlarni ololmayotganligi haqida xabarlar tarqalganidan so‘ng MIB undirilgan zararni qaytarish bo‘yicha amalga oshirilgan ishlar haqida ma’lumot berdi.
Qayd etilishicha, 12-oktabr kuni MIBning Toshkent shahar boshqarmasi ish yurituviga 2298 nafar fuqaro foydasiga jami 19 804 169 257 so‘m moddiy zarar undirish haqidagi ijro hujjati kelib tushgan.
Sudning hukmiga asosan, tergov davomida xatlangan 7 524 716 290 so‘m, 307 257 212 so‘m ortiqcha to‘langan soliqlarni, 254 632 846 so‘mga baholangan Malibu, 154 114 000 so‘mga baholangan Namangan viloyati Uychi tumani “Keskanyor” MFYda joylashgan yer uchastkasining umumiy maydoni 661,7 kvadrat metr bo‘lgan idora bino-inshootini hamda jami 201 181 173 so‘mlik ofis jihozlarini jinoyat natijasida yetkazilgan zararni qoplashga qaratish belgilangan.
IIV depozit hisob raqamida saqlanayotgan jami 7 524 716 290 so‘m MIBning Toshkent shahar boshqarmasi depozit hisob raqamiga o‘tkazilgan. Keyinroq 1456 nafar fuqaroga 7 189 972 822 so‘m proporsional taqsimlab berilgan.
Shuningdek, Malibu sotuvidan tushgan 236 961 327,04 so‘m hamda DSIdan qaytarilgan 307 257 212 so‘m ortiqcha to‘langan soliqlar undiruvchilarga proporsional taqsimlanib, 1456 nafar undiruvchiga 518 820 836 so‘m o‘tkazib berilgan.
Bundan tashqari, 201 181 173 so‘mlik ofis jihozlari realizatsiya qilish savdo do‘konlariga topshirilgan bo‘lib, shu kunga qadar sotilmagan.
Uychi tumanidagi yer uchastkasi ko‘zdan kechirilganda, ko‘chmas mulk obyektining maydoni aslida 3403,8 kvadrat metr ekanligi aniqlangan va ayni paytda ko‘chmas mulk obyektini baholatish choralari ko‘rilmoqda.
Lada avtomobili 76 870 000 so‘mga baholangan bo‘lib, hozirda auksion savdolari orqali sotish choralari ko‘rilmoqda.
Shuningdek, Qashqadaryo viloyati, Kitob tumanidagi turar joy obyekti 116 582 000 so‘mga baholatilgan bo‘lib, elektron onlayn-auksion savdosi 15-aprelga tayinlangan.
Bundan tashqari, Namangan viloyati, Uychi tumani, “Shifokor” MFYdagi savdo do‘koni mutaxassislar tomonidan baholatish ishlari olib borilmoqda.
“Mazkur yig‘ma ijro ishi alohida nazoratga olingan bo‘lib, hozirgi kunda jabrlanuvchilarga yetkazilgan zararlarni undirish bo‘yicha majburiy ijro harakatlari olib borilmoqda va undirilgan pul mablag‘lari undiruvchilarga proporsional taqsimlanadi”, — deyiladi MIB xabarida.
Eslatib o‘tamiz, Korean and migrations xususiy bandlik agentligi O‘zbekiston fuqarolarini xorijda ishga joylashtirishga ko‘maklashish bilan shug‘ullanishga litsenziya olib, jamiyatga murojaat qilgan fuqarolarni 3 oy ichida Janubiy Koreyaga ishga yuborishni va’da qilib, ular bilan soxta shartnoma tuzib, to‘lov kvitansiyalarini soxtalashtirgan, jami 2385 nafar jabrlanuvchining 24,8 milliard so‘m pullarini ATB “Turonbank” Chilonzor filialidagi hisob raqamiga to‘lov qildirib hamda o‘zlariga naqd ko‘rinishda qabul qilib, fuqarolarning juda ko‘p miqdordagi pul mablag‘larini firibgarlik yo‘li bilan qo‘lga kiritgan holda shaxsiy ehtiyojlariga sarflab yuborgan.
2019-yilning oktabr oyida Korean and migrations xususiy bandlik agentligiga berilgan litsenziya to‘xtatilgan, mart oyida agentlik mansabdor shaxslariga nisbatan jinoyat ishi bo‘yicha dastlabki tergov yakunlangan, iyun oyida sud jarayoni boshlangan, 2020-yil sentabrida sud hukmi e’lon qilingandi.
Izoh (0)