O‘zbekistonda 2017-yilning sentabr oyida amalga oshirilgan valyuta liberalizatsiyasi natijasida dollarning rasmiy kursi bir kecha-kunduzda bir baravarga oshib ketgandi. Ushbu islohot arafasida mamlakat banklaridan bilib-bilmay valyutada kredit olgan tadbirkorlar uchun shunchalik kutilmagan voqea bo‘lgan. “Rasmiy kurs”da banklardan valyutada kredit olganlar uchun ushbu “katta o‘zgarish” rejalashtirilmagan bosh og‘rig‘ini keltirib chiqargan.
Fevral oyida valyutada kredit olgan bir guruh tadbirkorlar murojaati asosida o‘tgan to‘rt yil davomida ularning muammosini hal qilish bo‘yicha mas’ullar tomonidan tayinli taklif berilmagani, liberalizatsiyaga qadar valyutada olingan kreditni karrasiga oshib ketgan kurs bilan qaytarish talabi ularni xonavayron qilayotgani yuzasidan “Daryo”da maqola e’lon qilingan edi. Unda 30 nafarga yaqin tadbirkorlar bir necha marotaba Vazirlar Mahkamasiga murojaat qilgani, lekin tayinli javob ololmayotganligi bayon etilgan.
Holat yuzasidan Vazirlar Mahkamasi mutaxassisi Sharofiddin Xoltemirov “Daryo” nashriga izoh berdi. Hukumat vakilining ma’lum qilishicha, tadbirkorlar murojaati Iqtisodiy taraqqiyot va kambag‘allikni qisqartirish vazirligida ishchi guruh a’zolari tomonidan muhokama qilingan.
“Unga ko‘ra, ishchi guruh a’zolari har bir tadbirkorlik subyektini joyiga chiqib o‘rganib keladigan bo‘ldi. Masalan, sovutgichlarda qancha mahsulot saqlayapti, nima faoliyat bilan shug‘ullanayotganini o‘rganib, xulosalar kiritdi. Bu bo‘yicha bosh vazirning chora-tadbirlar rejasi tasdiqlandi. Bunda oltita yo‘nalish bo‘yicha vazifa qo‘yildi:
1. Qaysi tadbirkorlar Tadbirkorlik faoliyatini rivojlantirishni qo‘llab-quvvatlash davlat jamg‘armasidan kompensatsiya olmayotgan bo‘lsa, ularga to‘lab berish;
2. Kredit muddatlarini uzaytirib berish;
3. Tuman hokimliklaridagi zaxirada turgan yerlardan ajratib berish, bunda tadbirkorlar mahsulot yetishtirib, o‘z sovutgichlarida saqlashga ko‘maklashish;
4. O‘zida saqlanayotgan ekinlar uchun bozorlarda rastalar tashkil qilib berish;
5. Eskportga yo‘naltirishga, ya’ni eksportyor korxonalarni topib, ularga ko‘maklashish;
6. Garov ta’minoti sifatida qo‘yilgan mol-mulklarini xatlovdan o‘tkazish va bugungi kundagi bozor qiymatida qayta baholash orqali garov shartnomalarini qayta rasmiylashtirish choralarini ko‘rish bo‘yicha tegishli vazirlik, bank va hududiy hokimliklarga 17-fevral kuni bosh vazir Abdulla Aripov tomonidan imzolangan topshiriq xati yuborilgan. Bu topshiriq bo‘yicha barcha murojaatchi tadbirkorlarga tushuntirish berganmiz”, — dedi Sharofiddin Xoltemirov.
Shundan so‘ng respublikaning turli hududlaridan 30 nafar tadbirkor ko‘rilayotgan choralar hech qanday yordam bermasligi, qaytanga, undan ham kattaroq yo‘qotishlarga olib kelishini bildirib, bosh vazir qabuliga kirish uchun Vazirlar Mahkamasi binosi yoniga bir necha marotaba yig‘ilgan. Mas’ullar 18-mart kuni tadbirkorlarni qabul qilib, ularning bosh vazir bilan muloqotlarini tashkil etish yuzasidan ma’lumot berdi.“Ishchi guruh to‘xtab qolgani yo‘q, bu bo‘yicha yana ishlayapmiz. O‘zimizning ham takliflarimizni tayyorladik. Mart oyining 25 yoki 26-sanasida bosh vazir qabulini rejalashtirib turibmiz. Men rahbariyat uchun kun belgilay olmayman. Rahbariyat bilan kelishgan holda kunni belgilab, tadbirkorlarga aytamiz. Bosh vazir ularni qabul qiladi”, — dedi Vazirlar Mahkamasi mutaxassisi.
Izoh (0)