Ўзбекистон фуқароларини Жанубий Кореяга жўнатиш бўйича фирибгарликка йўл қўйган Korean and migrations хусусий бандлик агентлигининг мансабдор шахсларига нисбатан қўзғатилган жиноят иши бўйича суд жараёни 2020 йил 14 сентябрь куни ниҳоясига етгани ва суд ҳукми эълон қилингани ҳақида хабар берилганди. Ушбу агентлик мутасаддилари турли муддатларга озодликдан маҳрум қилиниб, жабрланувчиларга етказилган моддий зарар ундириш белгиланганди.
Ижтимоий тармоқларда МИБ Korean and migrations хусусий бандлик агентлигидан жабр кўрган фуқароларнинг етказилган зарарларни ололмаётганлиги ҳақида хабарлар тарқалганидан сўнг МИБ ундирилган зарарни қайтариш бўйича амалга оширилган ишлар ҳақида маълумот берди.
Қайд этилишича, 12 октябрь куни МИБнинг Тошкент шаҳар бошқармаси иш юритувига 2298 нафар фуқаро фойдасига жами 19 804 169 257 сўм моддий зарар ундириш ҳақидаги ижро ҳужжати келиб тушган.
Суднинг ҳукмига асосан, тергов давомида хатланган 7 524 716 290 сўм, 307 257 212 сўм ортиқча тўланган солиқларни, 254 632 846 сўмга баҳоланган Malibu, 154 114 000 сўмга баҳоланган Наманган вилояти Уйчи тумани «Кесканёр» МФЙда жойлашган ер участкасининг умумий майдони 661,7 квадрат метр бўлган идора бино-иншоотини ҳамда жами 201 181 173 сўмлик офис жиҳозларини жиноят натижасида етказилган зарарни қоплашга қаратиш белгиланган.
ИИВ депозит ҳисоб рақамида сақланаётган жами 7 524 716 290 сўм МИБнинг Тошкент шаҳар бошқармаси депозит ҳисоб рақамига ўтказилган. Кейинроқ 1456 нафар фуқарога 7 189 972 822 сўм пропорсионал тақсимлаб берилган.
Шунингдек, Malibu сотувидан тушган 236 961 327,04 сўм ҳамда ДСИдан қайтарилган 307 257 212 сўм ортиқча тўланган солиқлар ундирувчиларга пропорсионал тақсимланиб, 1456 нафар ундирувчига 518 820 836 сўм ўтказиб берилган.
Бундан ташқари, 201 181 173 сўмлик офис жиҳозлари реализация қилиш савдо дўконларига топширилган бўлиб, шу кунга қадар сотилмаган.
Уйчи туманидаги ер участкаси кўздан кечирилганда, кўчмас мулк объектининг майдони аслида 3403,8 квадрат метр эканлиги аниқланган ва айни пайтда кўчмас мулк объектини баҳолатиш чоралари кўрилмоқда.
Lada автомобили 76 870 000 сўмга баҳоланган бўлиб, ҳозирда аукцион савдолари орқали сотиш чоралари кўрилмоқда.
Шунингдек, Қашқадарё вилояти, Китоб туманидаги турар жой объекти 116 582 000 сўмга баҳолатилган бўлиб, электрон онлайн-аукцион савдоси 15 апрелга тайинланган.
Бундан ташқари, Наманган вилояти, Уйчи тумани, «Шифокор» МФЙдаги савдо дўкони мутахассислар томонидан баҳолатиш ишлари олиб борилмоқда.
«Мазкур йиғма ижро иши алоҳида назоратга олинган бўлиб, ҳозирги кунда жабрланувчиларга етказилган зарарларни ундириш бўйича мажбурий ижро ҳаракатлари олиб борилмоқда ва ундирилган пул маблағлари ундирувчиларга пропорсионал тақсимланади», — дейилади МИБ хабарида.
Эслатиб ўтамиз, Korean and migrations хусусий бандлик агентлиги Ўзбекистон фуқароларини хорижда ишга жойлаштиришга кўмаклашиш билан шуғулланишга лицензия олиб, жамиятга мурожаат қилган фуқароларни 3 ой ичида Жанубий Кореяга ишга юборишни ваъда қилиб, улар билан сохта шартнома тузиб, тўлов квитанцияларини сохталаштирган, жами 2385 нафар жабрланувчининг 24,8 миллиард сўм пулларини АТБ «Туронбанк» Чилонзор филиалидаги ҳисоб рақамига тўлов қилдириб ҳамда ўзларига нақд кўринишда қабул қилиб, фуқароларнинг жуда кўп миқдордаги пул маблағларини фирибгарлик йўли билан қўлга киритган ҳолда шахсий эҳтиёжларига сарфлаб юборган.
2019 йилнинг октябрь ойида Korean and migrations хусусий бандлик агентлигига берилган лицензия тўхтатилган, март ойида агентлик мансабдор шахсларига нисбатан жиноят иши бўйича дастлабки тергов якунланган, июнь ойида суд жараёни бошланган, 2020 йил сентябрида суд ҳукми эълон қилинганди.
Изоҳ (0)