Shavkat Mirziyoyev: “Haqiqiy obod mahallada ‘temir daftar’, ‘ayollar’ va ‘yoshlar’ daftarlari bo‘lmasligi kerak”

Farg‘ona va Namangan shaharlarining 4 ta sektor rahbari 2021-yilning o‘tgan davrida ishdan olingan. Bu haqda Prezident Shavkat Mirziyoyev raisligida “Obod qishloq” va “Obod mahalla” dasturlarini 2021-yilda amalga oshirish masalalari muhokamasiga bag‘ishlab o‘tkazilgan videoselektor yig‘ilishida ma’lum qilindi, deya xabar bermoqda “Daryo” muxbiri.

“Bir narsani barcha hudud va sektor rahbarlari aniq tushunib olishi zarur. ‘Obod qishloq’ va ‘Obod mahalla’ deganda, nafaqat ularning yo‘llari yoki mahallaning qiyofasi yaxshilanishi, balki u yerdagi aholining daromadi ko‘payishi, ijtimoiy soha obyektlari to‘liq ishlashi, bir so‘z bilan aytganda, tanlangan mahalla har tomonlama obod bo‘lishi kerak.

Eng asosiysi, haqiqiy obod mahallada ‘temir daftar’, ‘ayollar’ va ‘yoshlar’ daftarlari bo‘lmasligi lozim. Buning uchun loyihalarni ishlab chiqishda qishloq va mahalla aholisi hamda tadbirkorlar bilan maslahatlashuvlar o‘tkazish orqali ular ishtirokini ta’minlash, bunda obodonchilik bilan bir qatorda, yangi ish o‘rinlari yaratish, ishlab chiqarish obyektlarini barpo etishni ham inobatga olish zarur”, — dedi davlat rahbari.

Prezidentning ta’kidlashicha, “Obod qishloq” va “Obod mahalla” dasturlari “bir martalik ish”ga aylanib qolmasligi, qilingan har bir so‘m investitsiya, odamlarga uch baravar ko‘p foyda keltirishi, ularning daromadini oshirishi lozim.

“Afsuski, hamma rahbarlar ham bu masalalarni tushunib yetmayapti. Misol uchun, Farg‘ona, Namangan va Toshkent viloyatlari mahallalaridagi haqiqiy holat buning aksi ekanini ko‘rsatdi. Shu sababli, Farg‘ona va Namangan shaharlarining 4 ta sektor rahbari ishdan olindi. Toshkent viloyati va Chirchiq shahri sektor rahbarlariga vaziyatni yaxshilash bo‘yicha muddat berildi. O‘zgarish bo‘lmasa, ularga ham chora ko‘riladi”, — dedi Shavkat Mirziyoyev.

Bundan avval Shavkat Mirziyoyev Xorazm viloyatida amalga oshiriladigan investitsiya loyihalari taqdimoti bilan tanishgani, Shavkat Mirziyoyev xalqaro konsultantlarni qabul qilgani hamda Facebook’da Shavkat Mirziyoyev nomidan sahifa ochib, pul evaziga yordam berishni taklif qilgan shaxs ushlangani haqida xabar berilgandi.