Бухоро ва Жиззахдаги нефть базаларида нефть маҳсулотларининг сақланиши, истеъмолчиларга етказиб берилиши, дебиторлик, кредитор қарздорликлар билан кўплаб ноўрин харажатлар, шунингдек, амалдаги қонунчиликка риоя қилинмаслик ҳолатлари аниқланди, деб хабар беради «Ўзбекнефтгаз» матбуот хизмати.
Вазирлар Маҳкамасининг 2018 йил 28 февралдаги 149-сонли қарорига асосан, нефть маҳсулотлари тўлов олдиндан 100 фоиз ўтказилганда етказиб берилиши белгиланган бўлса-да, амалда белгиланган меъёрий ҳужжатларга мунтазам амал қилмаслик оқибатида «Бухоро нефть базаси» МЧЖда салкам 33,5 миллиард сўм, «Жиззах нефть базаси» МЧЖда эса 35,4 миллиард сўмдан ортиқ дебитор қарздорлик юзага келган.
Шундан умумий ҳисобда 45,293 миллиард сўми 2021 йил 1 январь ҳолати бўйича муддати ўтган қарз саналади.
Бундан ташқари, ўз вақтида ундирув чоралари кўрилмагани натижасида, «Бухоро нефть базаси» МЧЖ бўйича 2009—2013 йилларга оид 1,8 миллиард сўм ва «Жиззах нефть базаси» МЧЖ бўйича 2006—2020 йилларга оид 14,1 миллиард сўм маблағ «умидсиз қарз»га айланган.
Шу билан бирга, ёқилғи етказиб берилган Бухородаги 32 та, Жиззахдаги 239 та собиқ хўжалик фаолияти бугунги кунда тугатилган ва қарздорликларни ундириш масаласи яна бир қатор муаммоларни туғдирмоқда.
Ўрганиш давомида «Бухоро нефть базаси» МЧЖга қарашли 67 та ФЁТШда 3,1 миллион литр, «Жиззах нефть базаси» МЧЖ тасарруфидаги ФЁТШ ва ПАЗСларда 8 миллион литр маҳсулот камомади аниқланган. Шундан бир қисми жараёнда қопланган.
Бундан ташқари, аниқланишича, ушбу нефть базаларидаги интизомий жазо қўлланилган ходимларга мукофот пуллари тўлаб берилган, меҳнат шартномаси бекор қилинган собиқ ходимларга эса ойлик иш ҳақи ёзиб келинган.
Ўрганишларда аниқланган камчиликларни ундириш ва вазиятга ҳуқуқий баҳо бериш учун ўрганиш ҳужжатлари тегишли тартибда ҳуқуқни муҳофаза қилувчи идораларга тақдим этилган.
Изоҳ (0)