Тожикистонда 22 мартдан аҳолини коронавирусга қарши эмлаш бошланди. Давлат раҳбарининг вакцинация бўйича имзолаган фармонига кўра, мамлакат аҳолисини эмлаш аҳолининг заиф гуруҳлари ўртасида босқичма-босқич амалга оширилади. Бу ҳақда Asia-Plus хабар берди.
Вакцинация муносабати билан Соғлиқни сақлаш ва аҳолини ижтимоий муҳофаза қилиш вазирлигига қуйидаги топшириқлар берилди:
- муайян босқичдаги эмлаш бўйича тадбирлар режасини ишлаб чиқиш ва тасдиқлаш, уни зудлик билан давлат ҳокимиятининг маҳаллий ижро этувчи органлари ва республика шаҳар ва вилоятларидаги масъул тиббиёт муассасаларига етказиш;
- COVID-19 юқумли касаллигига қарши вакцинани музлаткичли юк машиналарида сақлаган ҳолда, республика шаҳар ва вилоятларидаги тегишли тиббиёт муассасаларига ўз вақтида етказиб бериш ва аҳолининг заиф қатламларини иммунизация қилиш.
Хабарга кўра, биринчи бўлиб соғлиқни сақлаш вазири Жамолиддин Абдуллозода, унинг ўринбосари Самариддин Ализода ва ЮНИСЕФнинг Тожикистондаги вакили Осама Маккави Когали эмланди.
Эслатиб ўтамиз, COVAX дастури доирасида 8 март куни Ҳиндистондан Душанбега COVID-19’га қарши 192 минг доза Covishield вакцинаси етказиб берилди. Ушбу вакцина Оксфорд—AstraZeneca вакцинаси, аммо Ҳиндистонда ишлаб чиқарилган бўлиб, Covishield коди остида ЖССТ томонидан рўйхатдан ўтган.
Аввалроқ соғлиқни сақлаш вазирининг ўринбосари Самариддин Ализода COVAX дастури доирасида аҳолининг 20 фоизини эмланишини айтганди. Умуман олганда, Тожикистон ушбу дастур доирасида 624 минг дозада вакцина олади.
Covishield ҳақида гапирар экан, вазир ўринбосари Ҳиндистондаги Серум институти ўзини сифатли вакциналар ишлаб чиқарадиган профессионал институт сифатида намоён қилган, дея таъкидлади.
Айни пайтда Тожикистон Россиянинг «Спутник V» ва Хитойнинг CoronaVac вакциналарини рўйхатдан ўтказмоқчи. Ализоданинг айтишича, Тожикистон фуқаролари қайси вакцина билан эмланишини ўзлари танлаши мумкин. Вакциналар ихтиёрий равишда ва бепул берилади.
Аввалроқ Туркманистоннинг Тошҳовуз вилоятида шифокор ва полициячиларни Хитой вакцинаси билан эмлаш бошлангани ҳақида хабар берилганди. Хабарга кўра, вакцинанинг партияси 6 март куни мамлакатга олиб келинган. Айнан қайси вакцинадан фойдаланилганини аниқлашнинг иложи бўлмаган, чунки препаратнинг номи хитойча ҳарфларда ёзилган.
Эслатиб ўтамиз, 17 март куни Тошкентга AstraZeneca вакцинасининг 660 минг дозаси олиб келинди. Улар ЮНИСЕФ томонидан COVAX дастури доирасида олиб келинди. Вакциналар Ўзбекистонга бепул етказиб берилмоқда.
Изоҳ (0)