Qozog‘iston poytaxti Nur-Sultonda qor bo‘roni sodir bo‘ldi. Kuchli qor va qattiq shamol tufayli atrofni ko‘rib bo‘lmay qolgan. Sinoptiklarning xabar berishicha, shamol tezligi soniyasiga 20 metrni tashkil qilgan. Qozog‘iston gidrometeorologiya markazi shahar aholisini ko‘chalarni qalin muz qoplashi haqida ogohlantirgan. Havo harorati minus 7 daraja bo‘lishiga qaramay, minus 13 singari sovuq sezilmoqda, deb yozadi Tengrinews.
Akmola viloyati Favqulodda vaziyatlar boshqarmasining xabar berishicha, ob-havo sharoiti yomonlashgani — ko‘rish imkoniyati cheklangani, shamol va kuchli qor yog‘ishi sababli respublika ahamiyatidagi yo‘l uchastkalarida barcha turdagi transport harakati to‘xtatilgan:
- Nur-Sulton—Kabanbay Botir—Kiyevka—Temirtov, Kabanbay botir qishlog‘idan Qarag‘anda viloyati chegarasigacha, 32—51 kilometr;
- Yekaterinburg—Olmaota, Nur-Sultondan Temirtovgacha, 1291—1426 kilometr.
“Qarag‘anda—Nur-Sulton avtomagistralida kuchli qor bo‘roni transport harakatini cheklab qo‘ygan. Haydovchilar uch soatdan beri qordagi tutqunlikdan chiqishga harakat qilmoqda”, — deyiladi xabarda.
Nashrning ta’kidlashicha, ularning ba’zilari bilan bog‘lanishga muvaffaq bo‘lingan. Ularning aytishicha, yo‘lda ko‘rinish darajasi deyarli nolga teng. Shuningdek, yo‘llarda ba’zi baxtsiz hodisalar ham yuz bergan, jumladan, poytaxtdan 70 kilometr uzoqlikda yengil avtomobil va “Gazel” to‘qnashib, bir ayol jarohat olgan. Magistral yo‘lda qolib ketgan haydovchilar qutqaruvchilardan yordam so‘ramoqda.
Nur-Sulton shahar hokimligi rasmiy saytida aytilishicha, o‘tgan kun davomida poytaxtdan 31 ming kub metr qor tozalangan.
22-martdan 23-martga o‘tar kechasi shahar yo‘llari, piyodalar yo‘laklari, maydonlar va boshqa jamoat joylarini sanitariya tozalash ishlariga 450 dan ortiq ixtisoslashtirilgan texnika va 100 ga yaqin yo‘l tozalovchi ishchilar jalb qilindi.
23-mart kuni esa qor tozalash ishlariga 960 ta maxsus texnika va 1700 dan ortiq ishchilar safarbar qilingan.
Shuni ta’kidlash kerakki, Nur-Sulton shahrida qor tozalash ishlari ikki smenali rejimda kechqurun va tunda jadallik bilan olib boriladi, shuningdek, transport yo‘nalishlari sozlanadi.
Qoidaga ko‘ra, yo‘llarda tirbandlik hosil bo‘lmasligi uchun dastlab transport serqatnov bo‘lgan yo‘nalishlar tozalanadi. Shundan keyin, o‘rta zichlikdagi qism — maydonlar, chekka joylar, piyodalar yo‘laklari va boshqalar qordan tozalanadi.
Yig‘ilgan qorlar poytaxtning barcha tumanlarida mavjud o‘n bitta chiqindixonaga olib ketiladi. Poligonlarda nazorat uchun foto va videokameralar o‘rnatilgan.
Izoh (0)