AQSh va Rossiya muhim masalalarda kelishmovchiliklarga uchrayotgani tufayli, ularning o‘zaro munosabatlarini oldinda “og‘ir kunlar” kutmoqda. Bu haqda AQSh prezidentining milliy xavfsizlik bo‘yicha maslahatchisi Jey Sallivan MSNBC telekanaliga bergan intervyusida aytib o‘tdi, deb yozadi Meduza.
“Bizning fikrimizcha, Rossiya bilan munosabatlarda qiyin kunlar kutib turibdi, chunki o‘rtada chuqur kelishmovchiliklar hamda qat’iy javob qaytarishimizga majbur qilayotgan harakatlar mavjud. Shu bilan birga, Rossiya bilan muhim sohalarda, shu jumladan, bir necha hafta oldin besh yilga uzaytirilgan yangi “Strategik hujum qurollari to‘g‘risida Rossiya—Amerika shartnomasi” bilan yadroviy sohada hamkorlik qilishimiz mumkinligiga ishonamiz”, — dedi Sallivan.
Shuningdek, suhbat chog‘ida Sallivandan Jo Baydenning Rossiya prezidenti Vladimir Putinni qotil deb atagan bayonoti to‘g‘rimi yoki yo‘qligini so‘rashdi. Sallivanning aytishicha, Baydenning so‘zlari to‘g‘ridan to‘g‘ri savolga to‘g‘ridan to‘g‘ri javob bo‘lgan.
Avvalroq AQSh prezidenti Jo Bayden ABC telekanaliga bergan intervyusida jurnalistning “Rossiya prezidenti Vladimir Putinni qotil deb hisoblaysizmi?” — degan savoliga tasdiq javobini berdi. “Mmm, hmm, ha”, — deya javob qildi Bayden undan intervyu olayotgan Jorj Stefanopolusning savoliga.
Kreml esa Jo Baydenning Vladimir Putin haqidagi bayonotlarini “juda yomon” deb hisoblashini aytdi. Bu haqda Rossiya prezidentining matbuot kotibi Dmitriy Peskov jurnalistlarga bergan intervyusida aytib o‘tdi.
O‘z navbatida, Putin AQSh davlat rahbari Jo Baydenga to‘g‘ridan to‘g‘ri efir orqali muloqot qilishni taklif etdi. AQSh prezidenti Jo Bayden Rossiya prezidenti Vladimir Putin uni taklif qilgan ochiq muhokamaga rozilik berish-bermasligi haqidagi savolni e’tiborsiz qoldirdi.
Izoh (0)