O‘zbekistonda o‘tgan bir sutka ichida 113 kishida koronavirus aniqlandi

O‘zbekistonda 21-mart holatiga ko‘ra, koronavirus bilan kasallanganlar soni 81 559 kishiga yetdi. Bu haqda SSV matbuot xizmati xabar berdi.

O‘tgan bir sutka ichida mamlakatda yana 113 kishida COVID-19 tasdiqlangan, ularning 96 nafari — Toshkent shahrida.

Qolgan yangi kasallanish holatlarining

• 2 nafari Samarqand viloyati
• 1 nafari Buxoro viloyatida
• 2 nafari Qashqadaryo viloyatida
• 1 nafari Xorazm viloyatida
• 4 nafari Farg‘ona viloyatida
• 7 nafari Toshkent viloyatida

koronavirusga chalingan bemorlar bilan muloqotda bo‘lgani sabab namuna olingan fuqarolar orasida aniqlangan.

Shuningdek, Toshkent shahrida 57 nafar, Toshkent viloyatida 8 nafar bemor sog‘aygan bo‘lib, hozirga qadar respublika bo‘ylab koronavirusdan tuzalganlar soni 79 949 kishini tashkil etmoqda (98 foiz).

Ayni paytda tibbiyot muassasalarida davolanayotgan 988 nafar bemordan 141 nafari og‘ir, 23 nafari esa o‘ta og‘ir ahvolda.

Avvalroq 20-mart kuni bir sutkada 126 nafar kishida koronavirus aniqlangani haqida xabar berilgan edi. O‘zbekistonda 2021-yildagi yangi sutkalik antirekord.

​Eslatib o‘tamiz, O‘zbekistonda mart oyidan buyon kunlik kasallanishlar soni 100 kishidan ortiq bo‘lmoqda. Bunday holat so‘nggi marta 2020-yil dekabrida kuzatilgandi. Kasallanishlarning aksariyati Toshkent shahrida qayd etilmoqda. Poytaxtda koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygan. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan, 117-sonli bog‘chada ikki nafar tarbiyachi va bolalarda koronavirus aniqlangani sabab mazkur bog‘cha vaqtincha yopildi.