Shavkat Mirziyoyevning “Aholi va tadbirkorlik subyektlariga davlat xizmatlaridan foydalanishda yanada qulay sharoitlar yaratish, bu borada byurokratik to‘siqlarni qisqartirish bo‘yicha qo‘shimcha chora-tadbirlar to‘g‘risida”gi farmoni qabul qilindi.
Farmonga ko‘ra, 2021-yil 1-maydan xorijga chiqish biometrik pasportini rasmiylashtirish uchun ariza-anketani va davlat bojini elektron shaklda YaIDXP orqali to‘lash imkoniyati yaratiladi.
Ma’lum qilinishicha, 2021-yil 1-iyundan 16 yoshga to‘lgan shaxslarga ID-kartalar berish ularni soliq to‘lovchi sifatida hamda pensiya tizimida hisobga qo‘yish bilan bir vaqtda amalga oshiriladi.
Shuningdek, 2021-yil 1-iyuldan soliq organlarida soliq to‘lovchilarning hisobini yuritish jismoniy shaxsning shaxsiy identifikatsiya raqami (JShShIR)dan foydalangan holda amalga oshiriladi.
JShShIR barcha davlat, bank, ijtimoiy va boshqa xizmatlarni ko‘rsatishda fuqaroning shaxsini tasdiqlovchi yagona identifikator deb hisoblanishi belgilandi. Davlat organlari va tashkilotlari tomonidan jismoniy shaxslarni identifikatsiya qiladigan alohida raqamlarni yuritishga yo‘l qo‘yilmaydi.
Qayd etilishicha, 2021-yil 1-iyulga qadar:
- O‘zbekiston fuqarolarining hamda O‘zbekistonda yashash guvohnomasiga ega bo‘lgan chet el fuqarolari va fuqaroligi bo‘lmagan shaxslarning STIRi JShShIR bilan o‘zaro birlashtiriladi;
- STIR mavjud bo‘lmagan fuqarolarni va fuqaroligi bo‘lmagan shaxslarni JShShIR orqali soliq to‘lovchi sifatida hisobga qo‘yadi.
Shuningdek, hozirda ro‘yxatdan o‘tkazishning huquqiy asosiga ega bo‘lmagan davlat organlari va tashkilotlarini, yuridik shaxslar birlashmalari, shirkatlar, matlubot va kooperativlar hamda advokatlik tuzilmalarini davlat ro‘yxatidan o‘tkazish davlat xizmatlari markazlari tomonidan amalga oshirilishi belgilandi.
Bundan avval O‘zbekistonda 18 turdagi ma’lumot va hujjatning aholi hamda tadbirkorlardan talab qilinishi bekor qilinishi, O‘zbekiston fuqaroligi masalalarini ko‘rib chiqish tartibi belgilangani hamda O‘zbekiston Adliya vazirligi fuqarolardan ortiqcha hujjat talab qilgan o‘nga yaqin OTMni jazolagani haqida xabar berilgandi.
Izoh (0)