Andijon shahrida yashovchi fuqaro qo‘shnisi bilan tortishib qolib, uni pichoqlab o‘ldirdi. Bu haqda “Daryo” muxbiri Umidjon Mamarasulov xabar berdi.
Andijon viloyat sudi sudya katta yordamchisi Komronshoh Rasulovning ma’lum qilishicha, Andijon shahrining “Mustaqillik” mahallasida yashovchi Orif Rustamov (ism-familiyalar o‘zgartirilgan) 2020-yilning 3-oktabr kuni avvaldan birga ishlab yurgan qo‘shnisi Normurod Jalilovga qo‘ng‘iroq qilib, yollanma ishchi sifatida ishga chiqish taklifini bildirgan. Mast qo‘shnisi esa bu taklifga javoban “qorning och qoldimi? Agar och qolgan bo‘lsang, onangni ham ko‘chaga olib chiq” deya uni haqoratlagan.
Bunday munosabatni kutmagan Orif telefonini o‘chirib, haqorat sababini bilish uchun qo‘shnisining uyiga borgan. Dastlab qo‘shnisining uyida yo‘qligini eshitgan Orif bir necha soatdan so‘ng yana qo‘shnisinikiga qaytib kelgan. Va uni uyidan topib, mushtlashgan. Ularning janjalini ko‘rgan qo‘shnilar to‘polonga barham berib, ularni tinchlantirishga uringan.
Biroq jahli chiqqan Orif uyidagi xo‘jalik pichog‘ini olib, qo‘shnisini izlab yana ko‘chaga chiqqan. Shu payt ko‘chada Normurod paydo bo‘lgan va ular yana janjallashgan. Orif yonidagi pichoq bilan qo‘shnisi Normurodning qorin qismiga jarohat yetkazib, uni o‘ldirib qo‘ygan. Shundan so‘ng qamalishdan qo‘rqib, “lezviya” bilan o‘z joniga qasd qilishga ham uringan.
Mazkur ishni ko‘rib chiqqan sud Orif Rustamovni Jinoyat kodeksining 97-moddasi 2-qismi “j” bandi (qasddan odam o‘ldirish) bilan aybli deb topib, uni 16 yil 6 oy muddatga ozodlikdan mahrum qilgan.
Izoh (0)