Andijon viloyat xalq ta’limi boshqarmasi boshlig‘i Azizbek Mirkomilov maktabda o‘qituvchi o‘quvchini kaltaklagani aks etgan videoga munosabat bildirib, viloyatdagi ayrim o‘qituvchilardan tizimni sharmanda qilishni bas qilishni so‘radi.
2021-yilning 21-mart kuni ijtimoiy tarmoqlarda maktabda o‘qituvchi o‘quvchini kaltaklagani aks etgan video tarqaldi. Holatga munosabat bildirgan Asaka tuman xalq ta’limi bo‘limi voqea tumandagi 49-maktabda sodir bo‘lganini, boshlang‘ich sinf o‘qituvchisi bo‘lgan M.I. shu maktabning 4-sinfida o‘quvchi o‘g‘lini kaltaklaganini, holat yuzasidan Asaka tumani voyaga yetmaganlar komissiyasiga murojaat qilinganini bildirdi.
“Daryo” muxbirining ma’lum qilishicha, 22-mart kuni Andijon viloyat xalq ta’limi boshqarmasi boshlig‘i Azizbek Mirkomilov o‘zining Facebook’dagi sahifasida holatga munosabat bildirgan.
“Ijtimoiy tarmoqlarda maktab o‘qituvchisining o‘quvchini kaltaklagani, maktab direktorining tarqalgan rasmlari muhokamalarga sabab bo‘ldi. Ochig‘i, men bayramning qanday o‘tganini ham bilmadim. Nega, nima uchun, kim sababchi? Maktabdagi mazkur holatlar dargohdan baraka qochganligi, o‘qituvchilarning o‘zaro kelishmovchiligi direktorning oqibatini o‘ylamasdan qilgan ishlari natijasimikan, degan fikrlar keldi. Bunday olib qaralsa, shu fikrlar to‘g‘riligini video va fotolar ham isbotlab turibdi.
Ushbu holatni keng jamoatchilik bilan muhokama qilamiz. O‘qituvchi va direktorga chora ko‘ramiz, albatta. Lekin maktablardagi shunday holatlar qachongacha davom etadi? Ta’limning sifati buyoqda qolib, shaxsiy adovat tufayli tizimni sharmanda qilishga bu ‘ziyolilarning’ haqi bormikan?!
Hozirda o‘qituvchining darsni sifatli tashkil etishdan boshqa ishi qolmadi-ku, axir. Jamoat ishlariga jalb qilinmasa, oylik vaqtida berilsa, konspekt va boshqa hujjatlar kamaytirilgan bo‘lsa, yana bizga nima kerak?
Sizlarga murojaat qilar ekanman, tizimni sharmanda qilishni bas qiling, deyman! Qaytaraman, shaxsiy adovatingizni ishga aralashtirmang. Kamchiliklarimiz va amalga oshiriladigan ishlarimiz juda ko‘p. Agar birlashib ularni bartaraf etmasak, Andijon ta’limi rivojlanmay qolaveradi”, — dedi viloyat xalq ta’limi boshqarmasi boshlig‘i.
Izoh (0)