Olmaliqdagi bankka o‘g‘rilikka tushgan shaxs voqea joyida qo‘lga olindi

Toshkent viloyatining Olmaliq shahridagi bankka o‘g‘rilikka tushgan shaxs ushlandi. Bu haqda Milliy gvardiya matbuot xizmati xabar berdi.

Ma’lum qilinishicha, 22-mart kuni tungi soat 01:24 da Toshkent viloyati Qo‘riqlash boshqarmasining 4-bo‘linmasi monitoring markaziga Olmaliq shahar Amir Temur ko‘chasida joylashgan banklarning biridan “tashvish” xabari kelib tushgan.

Olingan xabarga ko‘ra, voqea joyiga yetib borgan qo‘riqlash xizmati xodimlari tomonidan bank binosining ichkarisida yurgan va qochishga harakat qilgan noma’lum shaxs qo‘lga olingan. Dastlabki surishtiruv ishlarida ushbu shaxs Navoiy viloyati Nurota tumanida 1996-yilda tug‘ilgan, hozirda Olmaliq shahrida vaqtincha yashab kelayotgan fuqaro Q.S. ekanligi aniqlangan.

U bankning 1-qavatida joylashgan ombor eshiklarini buzib kirish orqali ombor shiftidan 2-qavatda joylashgan bank filialiga tuynuk ochib kirgan.

Hozirda holat yuzasidan Olmaliq shahar IIB mas’ul xodimlari tomonidan surishtiruv ishlari olib borilmoqda.

Avvalroq Toshkentdagi kafedan 15 million so‘m bo‘lgan seyfni o‘g‘irlamoqchi bo‘lgan shaxs voqea joyida qo‘lga olingani haqida xabar berilgan edi.