Тошкент вилоятининг Олмалиқ шаҳридаги банкка ўғриликка тушган шахс ушланди. Бу ҳақда Миллий гвардия матбуот хизмати хабар берди.
Маълум қилинишича, 22 март куни тунги соат 01:24 да Тошкент вилояти Қўриқлаш бошқармасининг 4-бўлинмаси мониторинг марказига Олмалиқ шаҳар Амир Темур кўчасида жойлашган банкларнинг биридан «ташвиш» хабари келиб тушган.
Олинган хабарга кўра, воқеа жойига етиб борган қўриқлаш хизмати ходимлари томонидан банк биносининг ичкарисида юрган ва қочишга ҳаракат қилган номаълум шахс қўлга олинган. Дастлабки суриштирув ишларида ушбу шахс Навоий вилояти Нурота туманида 1996 йилда туғилган, ҳозирда Олмалиқ шаҳрида вақтинча яшаб келаётган фуқаро Қ.С. эканлиги аниқланган.
У банкнинг 1-қаватида жойлашган омбор эшикларини бузиб кириш орқали омбор шифтидан 2-қаватда жойлашган банк филиалига туйнук очиб кирган.
Ҳозирда ҳолат юзасидан Олмалиқ шаҳар ИИБ масъул ходимлари томонидан суриштирув ишлари олиб борилмоқда.
Аввалроқ Тошкентдаги кафедан 15 миллион сўм бўлган сейфни ўғирламоқчи бўлган шахс воқеа жойида қўлга олингани ҳақида хабар берилган эди.
Изоҳ (0)