Og‘ir vazn toifasida sobiq Jahon chempioni Mayk Tayson sobiq chempion Evander Holifildga qarshi jang qilishdan bosh tortdi.
Taysonga Holifildga qarshi uchinchi jang uchun 25 million dollar miqdoridagi kafolatlangan gonorar taklif qilingan. Biroq Mayk bu taklifga rad javobini bergan. Bu haqda Holifildning menejeri Kris Lourens xabar qildi.
“Biz bu kelishuv amalga oshdi degan fikrda edik, biroq Taysonning vakillari taklifimizni rad etganidan keyin hammasi barbod bo‘ldi. Biz shu vaqtga qadar muzokaralarni vijdonan olib bordik, biroq vaqtni bekorga sarflagan ko‘rinamiz”, — deydi Lourens.
Avvalroq faoliyatini qayta tiklagan Tayson Roy Jonsga qarshi jang qilgan va unda durang natija qayd etilgandi.
Tayson va Holifild ikki bor 1996 va 1997-yillarda o‘zaro jang qilgan. Ilk jangda Holifild nokaut evaziga g‘alaba qozongan, ikkinchi to‘qnashuvda esa Mayk raqibining qulog‘ini tishlab olgan va diskvalifikatsiya qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)