Bollivud filmlarini qo‘shiq va rang-barang raqslarsiz tasavvur qilib bo‘lmaydi. Ammo barcha aktyor va aktrisalarning ham qo‘shiq kuylaydigan shirali ovozi hamda iste’dodi bo‘lavermaydi. Shunday paytda kadr ortidagi qo‘shiqchilar ularning joniga oro kiradi. Filmlarning muvaffaqiyatli chiqishiga ijrosi bilan katta hissa qo‘shgan mana shunday xonandalaridan biri Alisha Chinay haqida ma’lumot berib o‘tamiz.
1965-yil 18-mart Gujarat shtatida dunyoga kelgan qizga Sujata deb ism qo‘yilgan, ammo keyinroq u Alisha deb atala boshlagan. Karyerasi davomida ulkan muvaffaqiyatlarga erishgan qiz “hind Madonnasi” deb ham atalgan.
Kompozitor Anu Malik bilan yozgan ilk “Jadoo” nomli albomi 1985-yilda taqdim qilingan. Uning muvaffaqiyatli chiqqanidan keyin Alisha Bollivudning musiqa olamini zabt etishni istagan. Bunda unga prodyuser va kompozitor Bappi Laxiri yordam bergan.
U ko‘plab filmlar uchun qo‘shiq kuylagan. O‘z davrining mashhur aktrisalari Mandakini, Juhi Chavla, Madhuri Dikshit va Shridevi uning ovozi bilan qo‘shiq kuylagan. Kadr ortidagi xonandaga bo‘lgan talab kundan-kunga ortib borgan. Shu sabab ham u 90-yillarda mashhur hind kompozitorlar bilan ishlashga muyassar bo‘lgan. Filmlar uchun qo‘shiqdan tashqari xonanda bir qancha albomlar taqdim qilib ham ulgurgan. “Aah”, “Alisha Unleashed”, “Soniya”, “Alisha: Baby Doll of India” va “Made in India” shular jumlasidan.
2000-yillar boshida qo‘shiqchi, bir qancha mashhur treklar: “Do‘st bo‘lib qolamizmi?” filmi uchun “Oh my darling”, “Banti va Babli” uchun esa “Kajra Re”ni kuylagan va aynan shu ijrosi uchun Filmfare mukofotini “Eng yaxshi ijrochi” sifatida qo‘lga kiritgan. Muvaffaqiyatga erishgani va yetarlicha mashhur ekaniga qaramay, Chinay bundan bir necha yil avval kadr ortida ijod qilishga nuqta qo‘ygan.
Uning fikricha, muxlislar qo‘shiqlarni aktrisalar kuylaydi deb hisoblaydi va kadr ortidagi ijodkorlarning mehnati ko‘zga ko‘rinmay, yulduzlar soyasida qolib ketadi.
Shuncha qo‘shiq kuylaganiga qaramay yetarlicha kam taqdirlangan xonanda yakkaxon ijro qilishga qaror qilgan. Muxlislar “O‘yna, o‘yna”, “Namaste London”, “Tezlik-2”, “Firibgar” singari filmlarda xonanda tomonidan kuylangan qo‘shiqlarni tinglashi mumkin.
Izoh (0)