«Made in India» хит қўшиғи ижрочиси Алиша Чинай ҳақида маълумотлар (фото ва видео)

Болливуд фильмларини қўшиқ ва ранг-баранг рақсларсиз тасаввур қилиб бўлмайди. Аммо барча актёр ва актрисаларнинг ҳам қўшиқ куйлайдиган ширали овози ҳамда истеъдоди бўлавермайди. Шундай пайтда кадр ортидаги қўшиқчилар уларнинг жонига оро киради. Фильмларнинг муваффақиятли чиқишига ижроси билан катта ҳисса қўшган мана шундай хонандаларидан бири Алиша Чинай ҳақида маълумот бериб ўтамиз.

1965 йил 18 март Гужарат штатида дунёга келган қизга Сужата деб исм қўйилган, аммо кейинроқ у Алиша деб атала бошлаган. Карьераси давомида улкан муваффақиятларга эришган қиз «ҳинд Мадоннаси» деб ҳам аталган.

Композитор Ану Малик билан ёзган илк «Jadoo» номли альбоми 1985 йилда тақдим қилинган. Унинг муваффақиятли чиққанидан кейин Алиша Болливуднинг мусиқа оламини забт этишни истаган. Бунда унга продюсер ва композитор Баппи Лахири ёрдам берган.

У кўплаб фильмлар учун қўшиқ куйлаган. Ўз даврининг машҳур актрисалари Мандакини, Жуҳи Чавла, Мадҳури Дикшит ва Шридеви унинг овози билан қўшиқ куйлаган. Кадр ортидаги хонандага бўлган талаб кундан-кунга ортиб борган. Шу сабаб ҳам у 90 йилларда машҳур ҳинд композиторлар билан ишлашга муяссар бўлган. Фильмлар учун қўшиқдан ташқари хонанда бир қанча альбомлар тақдим қилиб ҳам улгурган. «Aah», «Alisha Unleashed», «Soniya», «Alisha: Baby Doll of India» ва «Made in India» шулар жумласидан.

2000 йиллар бошида қўшиқчи, бир қанча машҳур треклар: «Дўст бўлиб қоламизми?» фильми учун «Oh, my darling», «Банти ва Бабли» учун эса «Kajra Re»ни куйлаган ва айнан шу ижроси учун Filmfare мукофотини «Энг яхши ижрочи» сифатида қўлга киритган. Муваффақиятга эришгани ва етарлича машҳур эканига қарамай, Чинай бундан бир неча йил аввал кадр ортида ижод қилишга нуқта қўйган.

Унинг фикрича, мухлислар қўшиқларни актрисалар куйлайди деб ҳисоблайди ва кадр ортидаги ижодкорларнинг меҳнати кўзга кўринмай, юлдузлар соясида қолиб кетади.

Шунча қўшиқ куйлаганига қарамай етарлича кам тақдирланган хонанда яккахон ижро қилишга қарор қилган. Мухлислар «Ўйна, ўйна», «Namaste London», «Тезлик-2», «Фирибгар» сингари фильмларда хонанда томонидан куйланган қўшиқларни тинглаши мумкин.