Shavkat Mirziyoyev ishtirokidagi Navro‘z bayrami shodiyonasi — suratlarda

Xabar berilganidek, Toshkentdagi Humo Arena majmuasida 21-mart kuni Navro‘z bayrami shodiyonasi bo‘lib o‘tdi. Tantanali tadbirda O‘zbekiston Prezidenti Shavkat Mirziyoyev ham ishtirok etib, barchani  Navro‘z bayrami bilan tabriklab, ezgu tilaklar bildirdi.

Prezident Navro‘z bayramini nishonlayotgan barcha xalqlarga, xorijiy hamkorlarga ezgu tabrik va salomlarini yo‘lladi.

Bayram tadbiri katta konsert dasturi bilan yakunlandi. “Daryo” fotomuxbiri ushbu tadbir hamda konsert dasturining qiziqarli lahzalari, mehmonlarini kadrlarga muhrladi.

O‘tgan yili pandemiya tufayli Navro‘z bayramini har doimgidek katta tantana qilib, keng nishonlay olmagan edik. O‘shanda bu tashvishli kunlar, albatta, ortda qoladi, hali ko‘p to‘y-tomosha va sayillarni xalqimiz bilan birgalikda o‘tkazamiz, deb ezgu niyat qilgan edik. Bugun ana shu orzu va intilishlarimiz ro‘yobga chiqmoqda. Go‘zal va jonajon yurtimizda yana shodiyonalar, quvonchli kunlar boshlanmoqda. Shavkat Mirziyoyev, O‘zbekiston Prezidenti

Navro‘zning o‘lmas ruhi va boqiy falsafasi biz bugun bunyod etayotgan yangi O‘zbekiston g‘oyasi bilan uyg‘un va hamohangdir. Xalqimizning fidokorona mehnati, qat’iy siyosiy irodamiz bilan keng ko‘lamli islohotlarimizni bundan keyin ham jadal davom ettiramiz. Qanchalik qiyin bo‘lmasin, el-yurtimiz manfaatini, jondan aziz farzandlarimiz kelajagini ta’minlashga xizmat qiladigan to‘g‘ri yo‘limizdan hech qachon ortga qaytmaymiz.Shavkat Mirziyoyev, O‘zbekiston Prezidenti

Konsert dasturi yakunlangach davlat rahbari arena hududida uyushtirilgan Navro‘z saylida ham ishtirok etdi.