O‘zbekiston xalq artisti Yulduz Usmonova “Xalqlar do‘stligi” saroyida 10—25-mart kunlari “Yurak” deb nomlangan navbatdagi yakkaxon konsert dasturini taqdim etmoqda.
O‘n olti kun davomida o‘n sakkizta seansdan iborat bo‘lishi rejalashtirilgan dastur to‘liq jonli ijroda bo‘lib o‘tmoqda. “Daryo” muxbiri Feruz Muhammad dasturning eng qiziq jarayonlaridan iborat reportaj tayyorladi.
Dasturning 15-mart kuni bo‘lib o‘tgan oltinchi kunida avvaldan rejalashtirilmagan, hattoki Yulduz Usmonovaning ham xabari bo‘lmagan holat bo‘lib o‘tdi.
“G‘animat” deb nomlangan qo‘shiq yakunida kutilmaganda muxlislar orasidan “Xalqlar do‘stligi” saroyi bosh rejissori Zokir Qayumov so‘zga chiqib, quyidagi so‘zlarni gapirdi.
Yulduzxon, uzr so‘raymiz, bugun tomoshabinlarimizga bir sovg‘amiz bor. Ustozlarni hurmat qilishingizni juda yaxshi bilamiz, ustozlarning duosi bilan shu sahnalarda ijod qilib yuribsiz. Sizning ko‘nglingiz Ka’basidan joy olgan, teatr va kino san’atining ustunlarini konsertingizga taklif qilib, ko‘rib qolsangiz, hayajonlanmang deb, ularga chiroq “bermasdan” o‘tiribmiz.Bugungi konsertingizda afsonaviy aktyorlar O‘zbekiston xalq artisti Turg‘un Azizov, Rixsi Ibrohimova, To‘ti Yusupova, Lutfulla Sa’dullayev, Baxtiyor Ixtiyorov, Tesha Mo‘minov, Muhammadali Abduqunduzov, sizlarning duoyingiz bilan Turkiyadan omon-eson kelgan Saida Rametova, barcha aktyorlarimizning kelishini ta’minlashga yordamlashgan O‘zbekistonda xizmat ko‘rsatgan artist Botir Muhammadjonovlar mehmon bo‘lib o‘tirishmoqda.
Zokir Qayumov, “Xalqlar do‘stligi” san’at saroyi bosh rejissori
Yulduz Usmonova sahnadan tushib, ustoz san’atkorlar oldiga borib, ularga minnatdorlik bildirdi.
“Barchangizga kattakon rahmat. Boringlarga shukr. Umringlar uzun bo‘lsin, ilohim. Biz hammamiz sizlarning yaratgan rollaringiz bilan katta bo‘ldik. Ta’zimlarimizni qabul qilinglar”, — deya butun zaldan olqishlarini ayamasliklarini so‘radi.
Yulduz Usmonova tomonidan kuylangan “G‘animat” deb nomlangan tarona nafaqat muxlislarni, balki O‘zbekiston xalq artistlarini ham ko‘z yoshlarini to‘xtata olmadi. Sahnadagi katta monitorda pandemiya vaqtida va undan avvalroq vafot etgan madaniyat, san’at va siyosat olami vakillarining suratlari namoyish qilindi.
Ma’lum bo‘lishicha, O‘zbekiston xalq artistlarining konsert dasturida mehmon bo‘lishi g‘oyasi konsert bosh rejissori va prodyuseri Mansur Agaliyevga tegishli bo‘lib, dasturda barcha xalq artistlari kelishi rejalashtirilgan ekan.
Izoh (0)