Taniqli o‘zbek kinorejissori Bahrom Yoqubov 11-mart kuni 60 yoshida olamdan o‘tdi. Jurnalist Feruz Muhammad rejissorning hamkasblari, shogirdlari bilan suhbatlashib, ularning Bahrom Yoqubov haqidagi xotiralari bilan bo‘lishdi.
“Tirikligida qayerda edingiz?!”
Feruzjon ijodingizni nihoyatda hurmat qilaman, lekin bir savol tug‘iladi, siz va siz kabi jurnalistlar nima sababdan bir insonni o‘lganidan keyin ularning ijodi, faoliyati haqida intervyular olishi kerak. Nima uchun? Nima sababdan Bahrom Yoqubov haqida o‘lganidan so‘ng intervyular olish boshlandi.
Shaxsiy hayot bilan hech kimning ishi bo‘lishi kerak emas, shaxsiy hayot daxlsiz bo‘lishi lozim. Men faqat Bahrom Yoqubov uchun bu gaplarni gapirmayapman, umuman olib gapiryapman. O‘lganidan so‘ng xotira ko‘rsatuv qilishning nima keragi bor. Odam o‘lib ketganidan keyin ko‘rsatuvlar emas, uning haqiga duo qilishimiz kerak. Vaholanki, intervyularni tiriklik vaqtida qilish kerak edi. Yaxshi ko‘rsatuv, intervyu, maqola uning hayotining uzayishiga xizmat qilardi.
Qaysidir filmlarda rol ijro etib, afsuslangan vaqtlarim bo‘lgan, “bekor o‘ynabman shu filmda”, deb haligacha o‘ylab yuraman. Ammo Bahrom Yoqubov filmlarida rol ijro etib, afsuslanmaganman. Yaxshi ijodkor, yaxshi rejissor edi. Alloh rahmatiga olgan bo‘lsin, ilohim.
Matyoqub Matchonov, O‘zbekistonda xizmat ko‘rsatgan artist
“Ulug‘bekni Ulug‘bek Qodirov, Shahzodani Shahzoda qilgan rejissor edi”
Nafaqat kinoda, balki hayotda ham ulardan ko‘p narsa o‘rganganman. Bu insonning gap-so‘zlarida xató bo‘lmas edi, kam gapirardilar, ammo juda o‘rinli gapni aytardilar. O‘zbekkino olamida nechta yulduz chiqqan bo‘lsa, avvalo, ular sababchi bo‘lganlar deb o‘ylayman. “Fotima va Zuhra” filmini suratga olganlaridan so‘ng Ulug‘bek Qodirov, Shahzoda, Gulchehra Eshonqulova, Ubaydulla Omon kabi ijodkorlarning u filmgacha ham muxlislari bo‘lgandir, biroq shu filmdan keyin haqiqiy yulduz sifatida e’tirof etildi. “Baxt uchun million”ni suratga olganlarida Sevinch Mo‘minova gurkirab ketgan, “Sogdiana”dan so‘ng Sogdiana ijodiy cho‘qqiga chiqqan. “Super kelinchak” filmi orqali nafaqat Adiz Rajabov va Diana mashhurlikka erishgan, balki Murod Rajabov hamda Saida Rametovaning ham qaytadan tug‘ulishi bo‘lgan deb o‘ylayman. Ular tomonidan suratga olingan bir qancha filmlarda suratga tushish nasib etdi. Yaxshi inson edilar, Alloh rahmatiga olsin.
Alisher Usmonov, aktyor
“Menga chiroyli kadr kerak emas”, derdilar…
Institutni bitirganimdan so‘ng serial suratga olganimni ko‘rib, meni ishga taklif etganlar. “Tashlandiq” deb nomlangan filmlarida operator bo‘lib ish boshlaganman. Ular bilan “Majruh”, “Super kelinchak”, “Mister Amerika”, “Ichkuyov”, “Jodugar”, “Yondiradi-kuydiradi”, “Men yulduzman”, “Boyvachcha kuyov” va so‘nggi filmlari — “O‘zbekcha ajralish”ni birgalikda suratga olganmiz. Bu inson haqiqiy, professional rejissor edi. Ulardan olgan saboqlarni butun umr esimdan chiqarmasam kerak. “Menga chiroyli kadr kerak emas, menga ssenariy bo‘yicha olingan, dramaturgiyasi chiqadigan jonli kadr kerak”, derdilar. Agar film dramaturgiyasi chiroyli kadrni talab qilsagina, chiroyli kadrlar olinardi.
“Mushtariy” deb nomlangan serial suratga olish niyatida yurgandilar. So‘nggi harakatlari shu serial bo‘yicha edi. O‘zbekkino olamida juda katta yo‘qotish bo‘ldi.
Umid Malikov, operator
“Juda ko‘pchilikning hayotida tub burulish qilganlar”
Kino olamiga rejissor bo‘lish uchun kelganman. Juda ko‘p rejissorlarga “shogirdlikka oling”, deb iltimos qilganimda ular meni o‘zlarining qora ro‘yxatiga kirgizib qo‘yishgan. Bahrom Yoqubovga shogird tushish uchun bir necha bor harakat qilganman, ammo maqsadimga yeta olmaganman. Keyin birdan o‘zlaridan taklif kelgan. Shundan so‘ng ssenariy yozishdan tortib, toki film premyerasigacha bo‘lgan barcha jarayonlarning ipidan ignasigacha o‘rgatganlar. Bahrom Yoqubov o‘zbekkino olamida bugungi kunda operator, rejissor, rassom, aktyor, aktrisa bo‘lib faoliyat yuritayotgan juda ko‘pchilikning hayotida tub burulish qilib berganlar. Ularning hayotini o‘z o‘rniga qo‘yib berganlar. Bu juda katta gap, katta savob, katta ish deb o‘ylayman. Ular bilan “Yondiradi kuydiradi”, “Jodugar”, “Boyvachcha kuyov”, “Majruh”, “Farhod va Shirin”, “Men yulduzman”, “O Maryam, Maryam” filmlarida birgalikda ishlash nasib etgan.
Ruslan Mirzayev, prodyuser
Izoh (0)